কমলবাবুগী জে এ সিনা মীয়ামগা লোয়ননা লৈমখোং আর্মীগী বেরেক মৈ থাখ্রে, জি ও সিগী মীতমসু মৈ থাদোকখ্রে

আসামগী কছার দিষ্ট্রিক্ট মনূং চন্না লৈরিবা গোসাইপুরদগী লাক্লগা হৌজিক্না ইম্ফাল নোংচুপ পানাগী লোইটাং খূনৌদা লৈরগা মোহোরি অমা ওইনা লৈমখোং আর্মী কেম্পতা কন্সট্রক্সন গী থবক থৌরমশিং য়েংশিনবগী থবক তৌরিবা লাইশ্রম কমলবাবুগী মরী-মখোঙ ঙসীফাওবা পূথোকপা ঙমদবগী মায়োক্তা খোয়শাওনরবা মীয়াম অমসুং মহাক মাঙখিবগা মরী লৈননা শেমখিবা জে এ সিনা খূৎশম্নদুনা ঙরাং কান্তো সাবলদা লৈরিবা ইন্দিয়ান আর্মীগী বেরেক মৈ থাদোকখ্রে।

মীয়াম অদূনা কমলবাবুগী মরী-মখোঙ খঙহল্লু হায়বা অকনবা খোল্লাউশিংগা লোয়ননা মায়কৈ কয়াদগী থোমজিন্নরকখ্রবা মতূংদা কান্তো সাবলদা লৈরিবা চ্যেক পোষ্ট তা সন্ট্রি তারিবা আর্মী পার্সনেলশিংদা হঞ্জিন হঞ্জিন্না জি ও সি উনগে, মখোয়বু চঙবা য়াহল্লু হায়রবসু থওইনা তাবিরক্তবগী মওংদা লৈথোকখিবদগী মীয়াম অদূ হেন্না হেন্না অশাওবগা লোয়ননা খোল্লাউ কয়া লাউবা হেঙ্গৎলকখি।

মদূফাওবদা তারক্তবদগী হৌনরুবা লৈতনা মুয়ামদুনা আর্মীগী বেরেক মৈ থাননবা থোমজীল্লকপদা আর্মী পার্সনেলশিংগা মূক্নরকখি। মমৈথঙদা মশীং য়াম্লবা মীয়াম অদূনা পার্সনেলশিং অদূ ওভর পৱার তৌদুনা গেট নমখায়দুনা চঙখ্রগা আর্মীগী বেরেক অদু মৈ থাদোকখিবনি। আর্মীগী অহেনবা ফোর্স থোমজীল্লক্তুনা মীয়াম অমসুং জে এ সিগী মীওইশিং অদূগা মূক্নদুনা লৈরিঙৈ চৈরক্তা মীয়াম মরক্তগী খঙহৌদনা জি ও সি মেজর জেনরেল এস এস কার্তিক্যাগী মীতম শাদুনা পুথোরক্লগা মৈ থাখি।