কে সিনাম-টি লাইজাং গি মরক্তা চীঙলম্বী নমথরকপদা পোৎ পুরকপা ট্রক অমা লোকখাদা তাশিনখ্রে

বংলাদেশ, আসাম, বেঙ্গলনচিংবা মফম কয়াদা চাউনা অমাঙ- অতা অমসুং মীশী-মীনা থোকহল্লিবা সমুদ্রগী তমথিরবা সাইক্লোন রেমালগী অকনবা চৈথেং মনিপুরদসু হৌখিবা মার্চ ২৭তগী ফংখিবগা লোয়ননা তম্পাক অমসুং ষ্টেট অসীগী চীঙগি মফম কয়াদা চাউনা অকায়বা থোকহনখ্রে।
মনিপুর তম্পাক্কি অকূৎপা মফম খূদীং ঈশীং ঈচাও থোক্তুনা সধারন মীয়ামগী মহৌশাগী পুন্সিদা চাউনা অকায়বা থোকহনখ্রে। চৈরকশিদা, ইম্ফাল জিরিবাম রোদ, নেসনেল হায়ৱে ৩৭ কি তোঙান তোঙানবা মফমশিংদা চীঙ নীঙখায়বগী থৌদোকশিং মচা মচা থোকপদগী লম্বী অসীদা গারী মখল অমত্তা চৎপা য়াদনা, অতৈ মফমশিংগা ফাওনবা য়াদনা লৈখ্রে।
কাংপোকপি দিষ্ট্রিক্ট মনূংচন্না কে সিনাম অমসুং টি লাইজাং অনীগী মরক্তা ইম্ফাল জিরিবাম লম্বীগী মফম অমদা নমথরক্তুনা নীঙখায়রকপগী থৌদোক অমদা পোৎ-চৈ থন্না পুদুনা লাকখিবা টাটা ট্রক অমা লোকখাদা তাশিনখ্রে। লম্বী পরিং অসীদা লম্বী নমথবগী থৌদোক থোকপদগী নুমীৎ খরনিগী মমাঙদগী ইম্ফাল দগী থোকখিবা অমসুং ইম্ফাল তম্না লাকপা গারী খূদীংমক মফম অসীদা পন্থদুনা লৈরকখি হায়রি। লোকখাদা ওন্থখ্রবা টাটা অদুদা তোংলকখিবা মীওইশিং অমসুং অতৈ মীওইশিং থৌদোক অদুদা শোকপদি য়াওখিদে হায়রি লম্বীগী শরুক অদু এন ঐচ আই দি সি এল না শেম্বগী থবক চত্থরগা লৈরিবনিসু হায়রি।