জুনিয়র গার্লস নেস্নেল ফুটবোল চেম্পিয়ন্সিপকী ৱিন্নর মনিপুরনা ওইরে

অন্দ্র প্রদেশকি আনন্টপুরদা লৈবা আর দি টি ষ্টেদিয়মদা থা অসীগী অহুমদগী টিম ১৬ না গ্ৰুপ মরি থোক্না খায়দোক্তুনা চত্থরক্লিবা টয়র ৱানগী জুনিয়র গার্লস নেস্নেল ফুটবোল চেম্পিয়ন্সিপ ২০২৪-২৫ গী ৱিন্নর মনিপুরনা ওইরে। ওল ইন্দিয়া ফুটবোল ফেদরেসন্না শীন্দুনা চত্থরক্লিবা চেম্পিয়ন্সিপ অসীদা মনিপুরনা হন্দক ৱিন্নর ওইরকপা অসীগা থারগা ১১ রক শুখিবগা লোয়ননা রন্নর্স অপ তারকপনা অনীরক শুখ্রে।

চত্থরক্লিবা চেম্পিয়ন্সিপ অসীদা ঙরাং ঝরখন্দগা লম্বা তৌদুনা শান্নখিবা ফাইনেল মেটচ অমদা মনিপুরনা ঝরখন্দবু গোল ২-০ দা মায়থীবা পীরমদুনা ৱিন্নর টাইটল লৌখিবনি। মনিপুরগী মায় পাকপগী গোলশিং অদু জর্সি নম্বর ১১ লৌরেম্বম মেনাকানা অহানবা হাল্ফ কি ৩৬ শুবা মিনিটতা টিমগী ওইনা গোল অমা চন্দুনা এক্কাউন্ট হাংদোকখ্রবা মতূংদা অনীশুবা হাল্ফ কি ৬৭ শুবা মিনিট তা জর্সি নম্বর ১৭ রেমি থোকচোম্না অনীশুবা গোল অমা চন্দুনা, পূন্না গোল অনী স্কোর তৌদুনা ঝরখন্দবু গোল ২-০ দা মায়থীবা পীখিবনি।

শান্নখিবা মেটচ অদুদা মনিপুরগী জর্সি নম্বর ৪ য়ুম্লেম্বম সগারিকা চনূদা অহানবা হাল্ফ কি ১৫ শুবা মিনিট তা, ঝরখন্দগী জর্সি নম্বর ১০ ইলিজাবেথ ইক্কাদা অনীশুবা হাল্ফ কি ৫৭ শুবা মিনিট তা, জর্সি নম্বর ৭ অনুস্কা কুমারিদনা অনীশুবা হাল্ফকি ৮৬ শুবা মিনিট তা রেফ্রিনা য়েল্লো কার্দ অমমম বুক তৌখি অদুগা মনিপুরগী জর্সি নম্বর ১৩ সরাংথেম এলিনাদা অহানবা হাল্ফ কি ১৮ শুবা মিনিট তা রেদ কার্দ অমা চার্জ তৌখি।