ইজরেলনা ওক্যুপাই তৌদুনা লৈরিবা ৱেষ্ট বেঙ্কতা লৈরিবা এল্লেনবাই ব্রিজ বোর্দর ক্রোসিংদা ইজরেল মচা অহুম নোংমৈ পায়বা মীওই অমনা কাপ্তুনা হাৎখ্রে। মীওই অদূ বোর্দর অদূ লান্সিন্দুনা জোর্দানদগী চঙশীল্লকখিবনি হায়রি। মহাকপু ইজরেলগী সেক্যুরিটি ফোর্স না নোংমৈনা কাপ্তুনা হাৎখ্রে।
হৌখিবা, মমাঙ চহীগী ওক্তোবর তরেত্তগী পারগা হন্দক্কি অসিনা বোর্দর ক্রোসিং অদুদা নোংমৈনা কাপ্তুনা মী হাৎপগী থৌদোক অসী অহানবা ওইরি। জোর্দান অমসুং ৱেষ্ট বেঙ্ক তাইনরিবা বোর্দর অসী য়াম্না সেন্সিটিব ওইবনা ইজরেল লান্মীনসু অহেনবা চেকশিন থৌরাংশিং অকনবা মওংদা লৌখৎলিবনি।
মমাঙ চহী ২০২৩ গী ওক্তোবর তরেত্তা পেলেষ্টিনিয়ান ইস্লামিষ্ট গ্ৰুপ হামাসনা খা থংবা ইজরেলদা এত্তেক চত্থরক্তুনা অশী-অনা, অমাঙ- অতা কয়া থোকহনখিবনি। মদুদগী গাজা লমদমদা ইজরেল লান্মীনসু লান লাউথোরক্তুনা হান্নদগী হেন্না কনশীনবা মওংদা ইজরেল অমসুং পেলেষ্টিনিয়ান শিংগী মরক্তা হৌজিক লান থেংনরিবনি।
এত্তেক অদূ ইজরেলনা কন্ট্রোল তৌরিবা কম্মর্সিয়েল কার্গো এরিয়াদা মায়োক্নখিবনি। কিং হুসেন ব্রিজ হায়রগসু হেন্না খঙনরিবা ক্রোসিং অদু আম্মান অমসুং জেরুসালেম অনীগী মরক্তা, ময়ায়ৱাইদা লৈবনি। হায়রিবা মফম অদূ দেদ সীগী অৱাং থংবা মফম্মক্তদনি হায়রি।
