জিরিবামদা তোঙান তোঙানবা রিলিফ কেম্প তরেৎ হাংদুনা মীওই ৯৪৩ চঙজফম লৌরি, সেক্যূরিটিগী মীফম পাঙথোকখ্রে

চৎলিবা থা অসীগী তরুক্তা কুকি মিলিটেন্ট শিংনা মশাগী চহী ৫৯ লোম শুরবা শরৎকুমার কৌবা মৈতৈ ফূরূপকী মীওই অমা তমথীনা হাৎলমখিবা অমসুং মদুগী মখা তাবা ওইনা অমুকসু মৈতৈ ফূরূপকী য়ূম কয়ামরুম মৈ থাদোক্তুনা হীংশা চত্থরকখিবা অদুনা মরম ওইদুনা হৌজিক জিরিবামগী তোঙান তোঙানবা মফমশিংদা রিলিফ কেম্প তরেৎ হাংদুনা মীওই ৯৪৩ কেম্প শিং অদুদা চঙজফম লৌদুনা লৈখ্রে।
কেম্পতা লৈরিবা মীওইশিং অদুদা দিষ্ট্রিক্ট এদমিনিষ্ট্রেসন জিরিবামগী মায়কৈদগী তঙায়ফদনা নোংমদা চঙবা চান্না-থক্ননবা চীঞ্জাক অমসুং অতৈ পোৎলমশিং ফংহনবা হৌখ্রে। মসীগীসু মথক্তা অসামগী কছার দিষ্ট্রিক্ট কি মনূং চন্না লৈরিবা লখিপুরদসু জিরিবাম দগী মীওই ৬০০ লোম হৌজিক চঙজফম লৌদুনা লৈখ্রে।
চৈরকশিদা, আসাম অমসুং মনিপুরগী পুলিসকি মকোকথোংবা ওফিসারশিংগী ওইবা মীফম অমা পাঙথোক্তুনা লাঞ্জেন্নরগা লৈরিবা মীওইশিং অশোয়- অঙাম থোকহন্দনবা, আসামগী কছার দিষ্ট্রিক্ট তা হীংশাগী ঈরাং থোকহন্দনবা খন্ন-নৈনখ্রে। থা অসীগী তরুক্তা কুকি মিলিটেন্ট শিংনা অকনবা হীংশাগী ঈরাং চত্থরক্তুনা মীতৈ কাঙলূপকি মী হাৎপা অমসুং য়ূমশিং মৈ থাবগী থবকশিং চত্থরকখিবা মরম্না মীওই কয়া শাফগদবা মফমশিংদা লাঞ্জেন্নখিবা অদুগা মরী লৈননা সেন্ট্রেল ফোর্স, মনিপুর পুলিস অমসুং বি জে পিগী ষ্টেট সেক্রেটরি কে শরতকুমার য়াওনা মীফম অমসু পাঙথোকখি।