চৎলিবা সেপ্তেম্বর থা অসীগী অঙনবা শরূক্তা কুকি- মিলিটেন্ট শিংনা জিরিবামদা মশাগী য়ূমদা তূমদুনা লৈজবা কুল্লেন্দ্রো কৌবা, মশাগী চহী ৬৩ রোম শুরবা অহল অমা পোইন্ট ব্লেঙ্ক তা নোংমৈনা মকোক্তা কাপ্তুনা হাৎলম্লবা মতূংদা হঞ্জিন-হঞ্জিন মফম অদোমগী মৈতৈনা খুন্দারিবা খুঙ্গংশিংদা চঙশীল্লক্তুনা অকনবা এত্তেক কয়া চত্থরক্তুনা মীওই কয়ামরুম শিহনখিবা থৌদোকশিংগী মতূংদা চৎলিবা থা অসীগী ১১গী অহীংদসু মখা তানা অকনবা এত্তেক চত্থরক্তুনা জিরিবামগী বোরোবেক্রাদা লৈবা প্রাইমারি হেল্থ সেন্টর (পি ঐচ সি) গী ওফিস বিল্ডিং তুম্না মৈ থাদোক্লম্লে।
মফম অদুগা য়াম্না নক্ননা লৈবা মৈতৈগী য়ূম অমসু তুম্না মৈ থাদোক্লম্লে। নুংথিলগী মতমদা য়ূম অদুদা মী লৈরবসু নুংদাং অমসুং অহীংগী মতমদদি অকিবা লৈবদগী ঈমূং অদূ য়াওনা লৈকায় অদূগী খুঞ্জাশিং শাফগদবা মফমশিংদা নাথৈরগা লৈহৌবদগী খুদোংথিবা নংখিদবনি। য়ূম অদূদি ঊৎ ওনখ্রে হায়রি। কুকি- মিলিটেন্টশিং অদুনা মৈ থাবগী থবকশিংদু চত্থরিঙৈ চৈরক্তুদা নোংমৈ রাউন্দ কয়ামরুমসু কাপথোক্লমখি হায়রি। মফম অদুদা সেক্যুরিটিগী পোষ্ট লৈনা লৈনা মতৌ করম্না মিলিটেন্ট শিং চঙশীল্লক্লগা হীংশা চত্থরম্লিবনো হায়বসি মীয়াম্না অঙকপা ফাওনরি।
মফম অদুদা আসাম রাইফলস কি পোষ্ট অমসু লৈবগী মথক্তা মিটর ২০০ রোমদমক লাপ্নরগা বোরোবেক্রা পুলিশ আউট পোষ্ট অমসু লৈরিবনি হায়রি।মনিপুর লৈঙাক্না মফম অদুদা মীয়ামগী পুন্সি অমদি লন-থুম নীঙথীনা, মপূংফানা ঙাক-শেনবা ঙমগদবা অহেনবা সেক্যুরিটি ফোর্স থম্বীয়ু হায়না খুঞ্জাশিংনা ফোঙদোরক্লি।
