জেনিমসকি দোক্তরশিংনা খোঙজঙ চঙশীনখিবদগী চাউনা খুদোংচাদবা মায়োক্নরে

লায়েংবা লাকপা অনাবশিং অমসুং মখোয়গী মরী মতাশিংনা দাক্তরশিংদা ঙাইহাক লৈতনা শীংনরকপগী থৌওংশিংবু কন্না য়ানিংদবা ফোঙদোক্তুনা জৱাহরলাল নেহরু ইন্সটিট্যুট ওফ মেদিকেল সাইন্সেস  (জেনিম্স)কি দোক্তরশিংনা ঙরাংদগী হৌনা নুমীৎ নিনী চঙশীনগদবা পেন্দবগী খোঙজং চত্থবা হৌখ্রে। হোস্পিটাল অসীগী মেদিকেল সুপরিন্টেন্দেন্টকি গেট মমাংদা মশীং য়াম্লবা দোক্তরশিং অমসুং মেদিকেল মহৈরোয়শিংনা য়ানিংদবা ফোঙদোক্তুনা ৱাকৎ মীফম চত্থখি। মখোয়না পেন্দবা ফোঙদোক্তুনা তোঙান তোঙানবা বেনরশিং পায়দুনা চত্থরকখিবা ৱাকৎ খোঙজং অদুনা মরম ওইদুনা হোস্পিটাল অসীগী অনা-লায়েংগী হীরমদা চাউনা খুদোংচাদবা, অকায়বা থোক্লে।

দোক্তরশিংনা খোঙজঙ চঙশীনখিবা অদুদা মীয়ামগী সেবাদা কত্থোকপগা লোয়ননা হিংলিবা দোক্তরশিংদা ঙাইহাক লৈতনা শীংনরকপগী থৌওংশিংবু কন্না য়ানিংদবা ফোঙদোক্তুনা বেনরশিং পায়দুনা অকনবা খোঙজঙ চঙশীনখি। নুমীৎ নিনী চঙশীনগদবা পেন্দবগী খোঙজং অদুনা মরম ওইদুনা হোস্পিটাল অসীগী ও পি দি, গাইনেকোলোজি, ওপরেসন থীয়েটরনচিংবগী থবক থৌরমশিংদা য়াম্না চাউনা খুদোংচাদবা মায়োক্নহল্লে। অদূম ওইনমক হোস্পিটাল অসিদা লৈরিবা ৱার্দশিংদা হান্নদগী হৌনা লায়েংদুনা লৈরিবা অনাবশিংদি মহৌশাগুম চেকশীন্না য়েংশিনবগা লোয়ননা অদুম্মক লায়েংবগী থবক চত্থখিগনি হায়রি। দোক্তরশিংদা ঙাইহাক লৈতনা শীংনরকপগী অমসুং মরাল শীবগী থবক লেপ্পু, হরাসমেন্ট চত্থবগী থৌওং খুদক্তা লেপ্পু, মেদিকেলগী লমদা থবক তৌরিবশিংদা খুরৌ থাংহনগনু, শেনখাই থুমখাই অমসুং হীংশাগী থবক খুদক্তা লেপ্পু হায়বনচিংবা প্লে কার্দ কয়া শীজিন্নখি।

দোক্তরশিংনা ঙরাংদগী হৌনা চঙশীল্লকখিবা খোঙজং অদু কনাগুম্বা মীওই নত্রগা কাঙলুপ অমত্তদা অত্তম্ননা চত্থবা নত্তে, অনা লায়েংবগী থবক তৌবা মেদিকেল ফ্রেটরনিটিদা ঙাইহাক লৈতনা শীংনরকপগী থৌওংশিংবু কন্না য়ানিংদবা ফোঙদোক্তুনা খোঙজং অদু চত্থবনি হায়খি। অনাবা অমনা লাইবক থীদুনা লৈখিদবা মতমদা লায়েংলিবা দোক্তর অমসুং অতৈ ষ্টাফশিংদা ওনশীন্দুনা এত্তেক তৌবসি খুদক্তা লেপকদবনি। দোক্তর অমত্তনা মশানা লায়েংলিবা অনাবা অদু খুদোংথীবা নংহনবা পাম্লোই হায়খি। মীয়াম্না মেদিকেলগী শিনফমদা লৈরিবা দোক্তরশিংবু নুংশিবিয়ু, ঈকায়খুম্নবা ঊৎপিয়ু হায়নসু সেনিয়র দোক্তর অমনা খোঙজং অদুগী সাইদলাইন্দা পাউমীশিংদা ফোঙদোকখি।