জাপান নেভিগী হেলিকোপ্তর অনী কায়দুনা পেসিফিক ওসীন্দা তাশিনখিবদা অমা শিরে, তরেৎ থিবা ফংদনা লৈরি

জাপান নেভিগী হেলিকোপ্তর অনী পেসিফিক ওসিন্দা কায়দুনা তাশিনবদা মীওই অমা শিরে অদুগা অতোপ্পা মীওই তরেৎনা থিবা ফংদনা লৈরি হায়না মেদিয়াগী রিপোর্ট অমনা ফোঙদোকখ্রে। জাপান সেল্ফ দিফেন্স ফোর্স( এস দি এফ) কি স্পোক্স পার্সন অমনা থৌদোক অদুবু কনফার্ম তৌখিবগা লোয়ননা মীওই অমদি থৌদোক অদুদা রেসক্যু তৌহৌরে হায়না ফোঙদোকখিবগা লোয়ননা পূং খরা লৈরগা মহাক লৈখিদবনি হায়না মখা তাখি।

জাপানগী দিফেন্স মিনিষ্টর মিনোরু কিহারানা ফোঙদোকখিবা অমদা, রেসক্যু ৱার্করশিংনা নেভিগী হেলিকোপ্তর অদুগী অকায়বা মচেৎ-মকায়শিং পেসিফিক ওসিন্দা তাদুনা লৈবা উবগা লোয়ননা থৌদোক অদু চুম্লে হায়বা কনফার্ম তৌরে হায়খি। হেলিকোপ্তর অদু মতৌ করম্না কায়খিবনো হায়বগী মতাংদা হৌজিক চপ চানা খঙবদি ঙমদ্রি অদুবু থেংজিন্নবগী থৌদোক অমদা কায়খিবা ওইরম্বা য়াবগী চাউনা থাজবা লৈ হায়খি।

নুমিদাং মতমদা সবমেরিনশিংগা মায়োকনদুনা ষ্ট্রাইক চত্থবা ঙম্ননবা রুটিন ওইনা এক্সরসাইজ চত্থরিঙৈদা কায়দুনা পেসিফিক ওসিন্দা তাশিনখিবনি। দিফেন্স মিনিষ্টর মিনোরু কিহারানা মখা তানা ফোঙদোকখিবদা, রেসক্যু ৱার্করশিংনা ক্রু মেম্বর অমা শিরে হায়বদু কনফার্ম তৌরে, ফ্লাইট রেকোর্ডরনচিংবা মরুওইবা মচাক খরসু ফংবা ঙমখ্রে হায়খি। হেলিকোপ্তর অদু পেসিফিক ওসিনগী ইজু আইলেন্দদা নুমিদাং মতমদা ট্রেনিং চত্থরিঙৈদা কায়খিবনি হায়খি। তোরিসিমা আইলেন্দদগী নুমিদাং পূং ১০.৩৮ তারকপা মতমদা হেলিকোপ্তর অদু পাউ ফাওনবা ঙমখিদবনি হায়রি।