জম্মু কাশ্মীরগী পুঞ্চ দিষ্ট্রিক্ট তা টেরোরিষ্টশিংগা সেক্যুরিটি ফোর্স কা অকনবা মওংদা নোংমৈ কাপ্নখ্রে

হৌখিবা নুমীৎ খরনি মমাঙদগী সেক্যুরিটি ফোর্স পার্সনেলশিং না চত্থরকখীবা সর্স ওপরেসনগী মনূংদা ঙরাং খঙহৌদনা জম্মু কাশ্মীরগী পুঞ্চ দিষ্ট্রিক্ট কি সুরনকোট লমদমদা টেরোরিষ্টশিংনা অকনবা মওংদা নোংমৈ কাপশীল্লকপদগী সেক্যুরিটি পার্সনেলশিংগী মায়কৈদগীসু খূৎ হন্দুনা নোংমৈ কাপ্নখ্রে। ষ্পেসিয়েল ওপরেসন্স গ্ৰুপ ( এস ও জি) অমসুং টেরোরিষ্ট শিংগী মরক্তা অকনবা মওংদা খূৎ থোক্নখিবনি হায়রি।

মফম অদোমদা জিরো টেরর প্লানগী থৌরাং চত্থনবা, এরিয়া দোমিনেসনগী থৌরাং কয়া লৌখৎনবা নুমীৎ খরনিগী মমাঙদা য়ুনিয়ন হোম মিনিষ্টর অমাট শহানা সেক্যুরিটি এজেন্সিশিংদা খঙহনখিবা মতূংদা টেরোরিষ্ট শিংনা এত্তেক অদু চত্থরকখিবনি। হৌখিবা নিংথৌকাবা নুমিত্তা চিফ ওফ দিফেন্স ষ্টাফ অনিল চৌহান্না জম্মু অমসুং উধম্পুরদা কোয়না চত্তুনা মফম অদুগী সেক্যুরিটি গী ফিভম রিভ্যু তৌদুনা য়েংশিনখিবগা লোয়ননা ওপরেসনশিং চত্থনবা শেম-শারিইবা কয়া অদুসু য়েংশিনখিবনি।

নোদর্ন আর্মি কম্মান্দর অমসুং জেনরেল ওফিসার কম্মান্দিং য়াওনা অতৈ আর্মিগী টোপ কম্মান্দর শিংনা দিফেন্স ষ্টাফকি চিফ অসিদা ব্রিফিং পীদুনা সেক্যুরিটিগা মরী লৈনবা ৱাফম কয়াগী মতাংদা পাউদমখিবনি। মমাঙগী চয়োলদসু টেরোরিষ্ট শিংনা মরিরক হন্না মফমশিং অদুদা এত্তেক চত্থরকখিবা থৌদোকশিংদা সি আর পি এফ পার্সনেলশিং অমসুং টেরোরিষ্ট অনী য়াওনা মীওই তরা শিখি। রিঅসি, কাথুৱা অমসুং দোদা দিষ্ট্রিক্ট শিংদা থোকখিবা থৌদোকশিং অদুদা মীওই ৫০ শু অশোক অপন মায়োক্নখিবনি হায়রি।