মনিপুরদা সেন্সসকি থবক-থৌরম পায়খত্রিঙৈ মমাঙদা এন আর সি থবক ওইনা পায়খৎকদবনি অমদি মীতোপশিং খন্দোক্তুনা মরমদমদা হলহনখিগদবনি হায়বা অকনবা দিমান্দ তকশীন্দুনা খোঙজঙ কয়ামরূম চঙশীন্দুনা লাক্লিবা জে এফ দি অমদি মৈরা পায়বী লূপশিংনা মখোয়গী মখা তারকপা খোঙথাঙ ওইনা লমদমসিগী এম এল এ, মিনিষ্টরশিংগা উনদূনা মখোয়গী করি -করম্বা অনীঙবা -অপাম্বশিং,হীরম অসীগী মতাঙদা লৈরিবগে হায়বদূগী মতাঙদা খঙদোক্ননবা ঈহৌ চঙশীনবা হৌখ্রে।
খোঙজঙ অসীগী মখা তারকপগী অহানবা ওইনা মনিপুর লৈঙাক্কি হোম মিনিষ্টর গোবিন্দাস কোন্থৌজমগা উননবা জে এফ দিগী থৌমীশিং অমদি বিষ্ণুপুর দিষ্ট্রিক্টকি মৈরা পায়বী লূপশিংনা নিংথৌখোংদা লৈবা মিনিষ্টরগী য়ূমদা চঙশীল্লুবদা মতম শাংনা ঙাইদুনা লৈরবা মতূঙদা উনবা ফংদনা হল্লকখ্রে।
মিনিষ্টরগী য়ূমদা মীয়াম অদূনা ঙাইদুনা লৈরিঙৈ চৈরক্তুদা বিষ্ণুপুর বি জে পি মন্দলগী সেক্রেটরি আর কে ফোলমনিগা ৱারী-ৱাতায় শানখি।কোন্নথংদা মিনিষ্টর গোবিন্দাস ইম্ফালদা লৈরি, লাকপা ঙম্লরোই হায়রকপদগী মীয়াম অদূ মৈ হৌনা শাউবগা লোয়ননা মফম অদুদগী থোক্নরকখি।
