ষ্টেট লৈঙাক্কি পব্লিক হেল্থ ইঞ্জিনিয়ারিং দিপার্টমেন্টনা লম্বী মতাইদা ফুমদুনা, মীয়াম্না থক্না-চানবা ঈশীং পুরিবা ৱাটর সপ্লাইগী পাইপ কায়দুনা লম্বী মথক্তা কাপথোরকপদগী ক্বাকৈথেল বজার ক্রোসিং দগী খাগেমপল্লিরোমদা তারক্লিবা টিদিম রোদ জঙ্কসনগী শরুকশিং, লম্বী ময়ায় অমসুং অকোয়বা মফমশিংদা ঈচাও থোক্লক্তুনা মীয়ামগী চৎথোক-চৎশীন তৌবদা অমসুং মহৌশাগী পুন্সিদা য়াম্না চাউনা অকায়বা থোকহনখ্রে।
টিদিম রোদ জঙ্কসনগী পান্থোয়বী হোটেল মপাদা ৱাটর পাইপ অদূ কায়রক্তুনা ঈশীং চেন্থোরকখিবনি। ঈশীংগী পাইপ কায়রক্তুনা য়াম্না মরূওইবা লম্বী অসীদা মীয়ামগী পুন্সিদা খুদোংচাদবশিং মায়োক্নরবা অসীফাওবদা পি ঐচ ই দি গী ওফিসিয়েলশিংনা শেমজীন্দবা হায়বসি য়াম্না দাইত্য খঙজদবা লৈঙাক্কি থৌওং অমনি হায়না মীয়ামগী মায়কৈদগী পেন্দবা ফোঙদোক্নরকলি।
থেঙনা ফংবা পাউগী মতুং ইন্না পাইপ কায়দুনা ঈশীং পাথোরক্লিবা মফম অদুদা পি ঐচ ই দিগী ষ্টাফশিং লাক্তুনা পাইপ অদূ শেমজীনখ্রে, ঈশীং পাথোক্লম্বা অদূ লেপখ্রে হায়রি।
