মনিপুরদা হৌজিক মায়োক্ন রিবা অকনবা হীংশাগী ঈরাং অসীনা লাঞ্জেন্নরগা রিলিফ কেম্পতা লৈরিবা মহৈরোয় মরি আসাম রাইফলসনা লেম্না হায়র ইদুকেসন ফংহন্ননবা থৌরাং পায়খৎপা লোইখ্রে। গুজরাট ষ্টেটতা লৈবা মশক নাইরবা য়ুনিভর্সিটি অমদা মনীপুরগী হৈথোই-শিংথোইরবা, টেলেন্ট য়াম্না লৈরবা মহৈরোয় মরি অদু এদমিসন ফী, ট্যুসন ফী নচিংবা লূপা লাখ ২০ লোমগী শেনফম চঙগদবা অদূ মখোয় মরীগী ওইনদি শেনফম অমত্তা লৌহন্দনা য়ুনিভর্সিটি অদুদা হায়র ইদুকেসন চত্থবা য়ারগনি হায়রি।
খুদোংচাদবা মায়োক্নরিবা, টেলেন্ট লৈরবা মহৈরোয় মরি অদুগীদমক আসাম রাইফলসনা গুজরাট য়ুনিভর্সিটি অদুগী ভাইস চাঞ্ছেল্লরদা হায়জরবা মতূংদা মহৈরোয় মরি অদুগীদমক স্কোলার্সিপকি শেনফম পীবিবগা লোয়ননা অচঙবা খরচ পূম্নমক স্কোলার্সিপকি শেনফম অদুনা মেনশীনখিগদবনি।
খঙ্গৎলবা মহৈরোয়শিং অদু মখোয়গী মমা-মপাশিংগা লোয়ননা আসাম রাইফলসনা গুজরাটতা বেজ তৌবা য়ুনিভর্সিটি অদুগীদমক ঙরাং ইম্ফালগী বির টিকেন্দ্রজিট ইন্টরনেস্নেল এয়রপোর্ট তা থিন্দোকখি। মহৈরোয়শিং অদু ঙরাং নুংথিল পুং ১.৫০ তাবদা ইন্দিগো ফ্লাইট ৬ই-২৪১৭ দা তোংদুনা অহমেদবাদকিদমক ইম্ফাল থাদোকখ্রে। মখোয়গী চপ চাবা লৈফম চাফম ফংদ্রিবফাওবা বাল বিদ্যা মন্দির সম্মিটিনা য়েংশিন্দুনা লৈফম চাফম পীগদবনি হায়রি।
