মনিপুরদা হৌখিবা কুমশিং ২০২৩ গী মে অহুমদগী হৌরকখিবা মৈতৈ-কুকি কম্যুনিটি অনীগী মরক্তা থোক্লিবা হীঙশাগী ঈরাঙ অসীগী মতাংদা থিজিনবগী থবক চত্থরক্লিবা জজ অহুম্না শাবা কম্মিসন ওফ ইনক্বারিগী মেম্বরশিং অসীনা চত্থোক-চৎশীন তৌবগী, লৈফম-চাফম্নচিংবগী খরচকি শেনফম অমত্তা পীরমদবা থেংনবদা সুপ্রিম কোর্তনা অঙকপা ফোঙদোকখ্রে।
জষ্টিস গিতা মিট্টালনা লুচিংবা জজ অহুম্না শাবা কম্মিসন ওফ ইনক্বারিগী মেম্বরশিং অসীনা চত্থোক-চৎশীন তৌবগী লৈফম-চাফম্নচিংবগী খরচকি শেনফম অমত্তা পীরমদবা অসী খ্বাইদগী অঙকপা অমনি হায়না এপেক্স কোর্ট অসীগী চিফ জষ্টিস সুর্য কান্তনা লুচিংবা, জষ্টিস জয় মালিয়া বাগচি অমসুং জষ্টিস বিপুল পঞ্চোইলি য়াওবা বেঞ্চনা য়াম্না কন্না পেন্দবা ফোঙদোকখিবগা লোয়ননা ইনক্বারি কম্মিসন অসীগী মেম্বরশিংদা মখোয়গী চত্থোক-চৎশীন তৌবগী অমসুং লৈফম-চাফমগী খরচ পূম্নমক রি-এম্বর্স তৌনবা মরী লৈনবা অথোরিটিশিংদা অকনবা ইন্সট্রক্সন পীখি।এনক্বারি কম্মিসন অসীবু লুচিংলিবা জষ্টিস গিতা মিট্টালদা লূপা লাখ ১২, মেম্বর ওইনা লৈরিবা জষ্টিস সালিনি ফান্সলকর জোসি অমসুং জষ্টিস আসা মেনন্দা লূপা লাখ ১০/১০ গী শেনফম রি-এম্বর্সমেন্ট তৌদুনা পীথোকখিনবা খঙহনখিবনি।
মনিপুরদা থোক্লিবা হীঙশাগী ঈরাঙ অসীদা সি বি আই অমদি মনিপুর পুলিসনা লৌখৎলিবা থবক-থৌরমশিংদা মোনিটর তৌদুনা লাক্লিবা মহারাষ্ট্রগী হান্নগী দি জি পি দত্ত ট্রে পদ্দসাল দিক্করগী মফমদসু লূপা লাখ ১০ গী শেনফম পীখিনবা এপেক্স কোর্ট অসীনা মরী লৈনবা অথোরিটিশিংদা খঙহনখি।
