মমাঙগী চয়োলদা য়ুনাইটেদ আরব ইমিরেট্সতা চৎলুবা ইন্দিয়াগী কেরলাদগী মশাগী চহী ৩৮ লোম শুরবা মীওই অমা তমথিরবা মোঙ্কিপোক্স ( এমপোক্স) না নারে হায়বসি কনফার্ম তৌখ্রে। মোঙ্কি ভাইরসনা নারবা কেরলা মচা অদু ষ্টেট অদূগী মালাপুরমদা লৈবা গভর্নমেন্ট মেদিকেল কোল্লেজ হোস্পিটালদা হৌখিবা নিংথৌকাবা নুমিত্তা এদমিট তৌরকখিবনি হায়রি। কেরলাগী হেল্থ মিনিষ্টর বিনা জোর্স না ফোঙদোরকখিবগী মতূং ইন্না, মীওই অদূদগী ঈগী সেম্পল লৌরবা মতূং কোঝিকোৎ তা লৈবা মেদিকেল কোল্লেজ হোস্পিটালগী ভাইরোলোজি লেবতা চাংয়েং চত্থনবা থাখিবনি।
মদুদা মহাক কনফার্ম তৌখিবনি হায়রি। মসীগী মতূংদগী লৈঙাক্না অহেনবা চেকশিন থৌরাং কয়ামরুম লৌখৎপা হৌখ্রে। মপান লৈবাকশিংদগী হল্লকপা মীওইশিং নীংথীজনা ইগজামিন তৌদুনা মোঙ্কিপোক্স কি লাইচৎ লোয়নরকপ্রা হায়বদু কূপ্না য়েংশিন্ননবা অমসুং লায়না- লাইচৎ অসী লৈরম্বা য়াই হায়বগী চিংনবা লৈরবদি আইসোলেটেদ রুমশিংদা থমদুনা ওবজর্বেসন্দা থমগদবনি হায়না ষ্টেট লৈঙাক্না অকনবা এদভাইস পীদূনা খঙহনবসু লৈখ্রে।
কেরলাগী তোঙান তোঙানবা হোস্পিটালশিংদা আইসোলেসন ৱার্দশিং শেমগত্তুনা অসীগুম্বা অনাবা মীওইশিং থমদুনা লায়েংননবা থৌরাং পায়খৎখ্রে। মোঙ্কিপোক্স নারবা মীওই অদূ মমাঙ চয়োলদা মালাপুরমগী ওথাইলি এরিয়াদা থুংলখিবনি হায়রি।
