বঙ্গলাদেসকি ওপোজিসন লিদরশিংনা ইন্দিয়াগী ফি- রোল অমসুং অতৈ পোৎলমশিং শেৎ-চাবা অসী য়ারিবমখৈ ককথনবা হোৎনগদবনি হায়না অকনবা দিমান্দ তৌরকখিবা অমগী পাউখুম লৈবাক অদুগী প্রাইম মিনিষ্টর শৈখ হসিনানা য়াম্না নীংথিনা পীরকখিবগা লোয়ননা ইন্দিয়াগী ফি- রোল বোইকোট তৌসি হায়রবদি নখোয় ময়ামগী লোয়নবীশিংনা শেৎলিবা সারিশিংদু হান্না পুথোকপিরক্লো অদুগা মৈ থাদোকপিয়ু হায়খ্রে। বংলাদেশতা লৈরিবা নূপী থিরবা নূপাশিংনা নখোয় নখোয়গী নূপীশিং অমসুং নচানূপীশিংনা ইন্দিয়াগী শারি কয়া য়াম্না শীজিন্নরিবগে হায়বদু হান্না খঙদোকপিরো অদুগা ময়ামদু পুল্লপ খোমজিল্লগা মৈ থাদোকপিয়ু হায়না শৈখ হসিনানা ফাগি ওইনা ফোঙদোকখি।
ওপোজিসন লিদরশিংনা করিগীদমক মখোয়গী নূপীশিংগী শারি হৌজিক ফাওবা মৈ থাদুনা মাঙহন্দ্রিবনো হায়না হসিনানা হংখি। শৈখ হসিনা অসি থংনা-থংননা প্রাইম মিনিষ্টর ওইরকপনা হন্দক্কি টার্ম অসি থারগা মরিরক শুরবিনি। মতম অমদা বংলাদেশ নেস্নেলিষ্ট পার্টিনা সাসন পায়রিঙৈদা ইন্দিয়াদগী মশীং নাইদনা গারি ট্রিপ কয়ামরূমগী শারিশিং মতমদুগী মিনিষ্টরশিং অমসুং মখোয়গী নূপীশিংনা বংলাদেশতা হোঞ্জিল্লকখি। শারিশিং অদু বংলাদেশকি মীয়ামদা য়োনশিনখিবনি হায়না হসিনানা ফোঙদোকখি। হৌজিক ফাউবা ইন্দিয়াগী স্পাইসেস অমসুং অতৈ পোৎলম কয়া বংলাদেশকি চাকখূমশিংদা শীজিন্নদুনা লৈরিবনি।গরম মসলা, তীলহৌ, চনম্নচিংবা ইন্দিয়াদগী ঙাক্তনি হায়খি।
ইন্দিয়াদগী পোৎলমশিং শীজিন্নবা তোক্সি হায়রবদি নখোয়গী চাকখূমদা লৈরিবা, শীজিন্নরিবশিংদু হান্না মাঙহনবিখ্রো হায়খি। ইন্দিয়া-আউট হায়বা খোঙজং অমা বংলাদেশকি ওপ্পোজিসন্না চঙশীল্লিবা অদুগী শরুক অমা ওইনা বি এন পিগী লুচিংবা রাহুল কবির রিজবিনা মহাক্কী কাস্মিরি সাল পুথোক্লগা লম্বী ময়ায়দা লংথোক্তুনা সিম্বোলিক ওইনা খোঙজং চঙশিনখি।ওপ্পোজিসন বি এন পিনা শাউরিবদি হন্দক পাঙথোকখিবা জেনরেল ইলেক্সন্দা শৈখ হসিনাবু ইন্দিয়ানা য়াম্না চাউনা মায় পাক্নবা হোৎনদুনা মতেং পাংখি, মদুনা মহাক্কী মায় পাক্নবগী অচৌবা মরম অমা ওইখি হায়বসিনি।
