ইন্দিয়া-ম্যান্মার ঙমখৈগী মনিপুরগা তাইনরিবা ঙমখৈ পরীং পূম্নমক নীংথীজনা ফেন্সিং তৌবা হৌরে, হৌজিকফাওবদা কিলোমিটর কূন্থরা শাংবা শম্বল খাবগী থবক মপূংফানা লোইশিল্লে হায়না হন্দক নোংমা- নীনীগী মমাঙদা য়ুনিয়ন হোম মিনিষ্টর অমিট শাহানা ফোঙদোকপা লৈখ্রে। নাকল অমরোমদনা, য়াম্না থাজনিঙায় ওইবা হোম এফিয়র্স মিনিষ্ট্রিগী ছোর্স অমগী মতূং ইন্নদি, হৌজিক ঙমখৈ শম্বল খাবগী থবক চত্থরক্লিবা অসীগী মায়োক্তা ঙমখৈ পরীং মনাক্তা খুন্দারিবা কুকিশিংনা য়াম্না অকনবা মওংদা অথীংবা পীদুনা, শম্বল খাবগী থবক তৌরিবা ওফিসিয়েলশিং অমসুং শিন্মিশিং থবক শূবা য়ারোই হায়দুনা খোঙজঙ চঙশীনবদগী মখা তানা শম্বল খাবা ঙমদনা লৈরি হায়রি।
কুকিশিংনা খুন্দারিবা এরিয়াশিংগী ওইনা শম্বল খাবগী থবক অসী তোক্লগা অতৈ মফমশিংদা ওইনা শম্বল খাবগী থবক অসী কান্থোক্লগা চত্থরি হায়রি।
হীংশাগী ঈরাং অসী লোইরবা মতূংদা শম্বল খাবিয়ু, হৌজিকমক্কি ওইনদি কুকিশিংনা লৈরিবা খুলশিংগী মপাদা শম্বল খাবিখিগনু হায়জরকপদগী সেন্টরগী ওথোরিটিশিংনসু অয়াবা অমা পীরকখিবা মরম্না কুকিশিংনা খুন্দারিবা মফমশিংদি শম্বল খাবগী থবক অসী মখা চত্থদনা লৈবনি হায়রি।
