ইন্দিয়া অসি কেন্সর কেপিটেল ওফ দি ৱার্ল্ড মিংথোল ফংলে

ৱার্ল্ড হেল্থ ডে-২০২৪ থৌরমগা মরী লৈননা পুথোকখিবা এপোলো হোস্পিটালসকি হেল্থ ওফ নেসন রিপোর্ট কি মরিশুবা এদিসনদা ইন্দিয়া অসি মালেমগী ওইনা কেন্সর লায়নাগী ওইনদি কেপিটেল ওইরে হায়না লাউথোকখ্রে। লৈবাক অসিদা নন-কম্যুনিকেবল দিজিজশিংগী চাং কা হেন্না ৱাংখৎলকপগা লোয়ননা কেন্সর লায়না লাইওং থেংনবগী চাংসু অতিয়া তম্না পাইখৎলক্লি হায়না রিপোর্ট অসিদা ফোঙদোকই।

রিপোর্ট অসিগী মতূং ইন্না ইন্দিয়াদা মীওই অহূম খূদিংগী মী অমদি প্রি-দাইবেটিক কন্দিসন মায়োক্নৈ, মীওই অহুমগী মনুংদা অনীদি প্রি-হায়পরটেন্সিবকি নুঙাইতবশিং থেংনৈ অদুগা মীওই তরাগী মনুংদা অমদি দিপ্রেসনগী খুদোংচাদবা মায়োক্নরগা পুন্সি লেনবগী ফীভম মায়োক্নরগা হিংলি হায়না ফোঙদোকই।নন-কম্যুনিকেবল দিজিজ হায়বদি কেন্সর, দাঈবেটিস, হায়পরটেন্সন, কার্দিওভাস্কুলর দিজিজ মখলশিং অমসুং পুক্নিং ৱাখলগা মরী লৈনবা অনাবা মখলশিংসু মিপাইনিঙায় ওইবা থাক্তা হেঙ্গৎলকপা থেংনরে হায়রি।

মসীনা নেসন অসীগী হেল্থ ফেনোমেনন্দা অচৌবা চৈথেং পীরক্লি লোয়ননা ইন্দিয়াদা হেঙ্গৎলক্লিবা কেন্সর লায়নাগী থাক অসি মালেমগী ওইনা হেঙ্গৎলক্লিবা চাংচত্তগী কা হেন্না কাপগৎখ্রে হায়না রিপোর্ট অসিনা ফোঙদোকই। মসীনা মরম ওইদুনা ইন্দিয়া অসি মালেমগী ওইনা কেন্সরগী কেপিটেল অমা ওইরে হায়বদা অরানবা ওইররোই হায়খি। লৈবাক অসিদা প্রি-দাইবেটীস, প্রি-হাইপরটেন্সন অমসুং মেন্টেল হেল্থ দিসওর্দরগী প্রোব্লেম কয়ামরূম চহী নৌরিবা অঙাঙশিংদা থেংনরি হায়রি।