ইম্ফাল ইষ্ট দিষ্ট্রিক্ট কি লম্লাইদা লৈবা চীংপু শাবি লাইরেম্বি চীংদা চিফ মিনিষ্টর নোংথোম্বম বিরেন না লুচিংদুনা উ চারাশিং থাখ্রে। হুম্ফুতরামঙারক শুবা বন মহোৎসব, ২০২৪ গা মরী লৈননা উ চারাশিং থাখিবা থৌরমদুদা এক পের:মাকে নাম- ঈমাগী মিংদা তঙায়ফদনা উপাল অমত্তংদি থাবিয়ু, ঈমাগী মিংদা উ থারবদি ঐখোয় খূদিংমক্না ঈমাগীদমক্নি হায়বা ৱাখল্লোন অমগা লোয়ননা মখোঙ শোমদুনা, ঈশীং চাইদুনা, শম্বল চেকশীন্না খারগনি লোয়ননা থারিবা উপালদুনা মীওইবা অমসুং অতৈ থৱায় পানবশিংগী পুন্সিদা হায়নীঙায় লৈতনা কান্নবসু পীবা ঙম্লগনি হায়না চিফ মিনিষ্টর অসীনা ফোঙদোকখি।
মনিপুর লৈঙাক্কি ফোরেষ্ট দিপার্টমেন্ট না শীন্দুনা পাঙথোকখিবা উ চারা থাবগী থৌরমদুদা চিফ মিনিষ্টর না হায়, প্রাইম মিনিষ্টর নরেন্দ্র মোদিনা ঈমাগী মিংদা মীয়াম্না উ চারাশিং থাননবা পুথোরক্লিবা ইন্নোভেটিব আইদিয়া অসীগীদমক চাউথোকচবা পোকই, ঐখোয়না প্রাইম মিনিষ্টর অসীবু হায়নিঙায় লৈতনা থাগৎফম থোকপনি হায়বা মহাক্কি ৱাফম ফোঙদোকখি। অসুম তৌরবদি মীওইবগা উপাল-ৱাপালগা হেন্না নুংশিনবগী অমসুং হেন্না নকশীন্নবা মরী অমা শোয়দনা থম্বা ঙম্লকপগা লোয়ননা অশঙ- অমান্না থল্লবা, নুঙাইরবা মালেম অমা শেমগৎপা ঙম্লক্কনি হায়খি।
ঐখোয়না হিংনবগীদমক মহৌশা লাইরেম্বী য়োকখৎপা মথৌ তাই অদুবু মহৌশা কৌবি লাইরেম্বীনদি মীওইবগী মতেং মথৌ তাদে হায়খি।
