ইন্দিয়া মেটিওরোলোজিকেল দিপার্টমেন্ট (আই এম দি)না মনিপুরদা মখা তানা অকনবা নোং তাখিগনি হায়না খঙহল্লকপগা লোয়ননা মীয়ামগী পুন্সিদা অশোয়- অঙাম থোকহন্দনবা গাইদলাইনশিং ইস্যু তৌখ্রে। হৌখিবা নুমিৎ মাপন্নিরোম অসীদা ষ্টেট অসীদা অকনবা মওংদা নোং তারকপদগী হেন্দোকখিদুনা কা হেন্না কনবা চাং য়ৌনা নোং তাখিবগা লোয়ননা মরু ওইবা তুরেলশিংগী ঈশীং ঈমায় ৱাংখৎলকপগা লোয়ননা খুদোংথীনিঙায় ওইবা থাক য়ৌনা লৈরকখিবা মতূংদা ঙরাংদগী ঈথায় বেরেজগী গেট পূম্নমক হাংদোকখিবদগী তুরেলশিংগী ঈশীং ঈমায় খরা হন্থরকপগী ফীভমদা লৈরে হায়রবসু মনিপুরদা মখা তানা অকনবা নোং তাখিগনি হায়না খঙহল্লকপনি।
মীয়ামগী পুন্সিদা চাউনা অকায়বা খুদোংচাদবা মায়োক্নরকখিগনি হায়না খঙহল্লকপনি। তুরেলশিংগী তোর্বান কায়বা, লৌনম্বাল পাথোক্তুনা মীয়ামগী য়ূম-কৈ লৈরিবা খুঙ্গংশিংদা ঈচাও মায়োক্নরকপা য়াবগী ওইথোকপা লৈবনা মীয়াম্না মীৎ-না শিংনা লৈগদবনি। লোকেল, ষ্টেট, নেস্নেল ওথোরিটিশিংনা মতম মতমগী ওইনা পীবা ঈশীং নুংশিৎকি ঈ-পাউ লৌশিনগদবনি, তোকঙা শন্দোরকপদা থাজরোইদবনি হায়রক্লি।
নীঙখায়রকপা য়াবা চীঙ, তেকথরকপা য়াবা উপাল-ৱাপালশিংগী মনাক্তা লৈরোইদবনি অদুগা অনেম্বা তুরেলশিংগী তোর্বান মনাক্তা চঙশীন্দুনা লৈরোইদবনি হায়না খঙহল্লক্লি। ঈশীং, পত্থ-পুমথরোইদবা চীঞ্জাকশিং, ফার্স এইদ কিটশিং, টোর্স লাইট, হীদাক লাংথক্কি ওইবা পোৎলমশিং মতম পূম্নমক্তা ঈশাদা লোয়নদুনা, শাগোন্ন দুনা লৈগদবনি হায়রি।
