হীজাব, নাকাপ, টুপি শীজিন্নবদা থিংবা নত্তে, কল্লেজ কেম্পসতা য়ুনিফোর্ম দ্রেস কোদ ঙাকশী হায়বনি :মেনেজমেন্ট

হৌখিবা য়ূমশকৈশা নুমিত্তা মুম্বাইগী সিতিদা লৈবা কল্লেজ অমগী মেনেজমেন্ট না বোম্বে হায় কোর্টতা ফোঙদোকখিবা মতূং ইন্না, কল্লেজ অদুনা মশাগী মহৈরোয়শিংদা য়ুনিফোর্ম দ্রেস কোদ ঙাক্ননবা মমাঙদগী হৌনা রুল অমা থমদুনা লাক্লিবদু নিয়ম অমগী মখাদা মান্নবা দ্রেস কোদ অমা শীজিন্ননবা খঙহনবনি, মদুনা মুসলিম নূপীমচা মহৈরোয়শিংগী লাইনিং লাইশোনগী ফীজোল নত্রগা চৎনবীদা অথিংবা পীরুবগী ৱাফম করিসু লৈতে হায়না অকনবা মওংদা আরগ্যুমেন্ট পীখ্রে।

কল্লেজ অদুগী অথোরিটিনা মহৈরোয়শিংদা য়ুনিফোর্ম দ্রেস কোদ অমা থমদুনা কল্লেজ কেম্পসতা চৎনহন্ননবা রুল অমা শেম্লকখিবা অদুনা মরম ওইরগা মুসলিম মহৈরোয়শিং, মরুওইনা ফূরূপ অসীগী নূপীমচা মহৈরোয়শিংনা শীজীন্নরিবা হীজাব, নাকাপ, ষ্টোলশিং, বূর্কা, টুপিনচিংবা শীজিন্নবা তোকহনবগী ফীভম লৈরে হায়না কল্লেজ অদুদা অনীশুবা অমসুং অহুমশুবা চহীগী সাইন্স দিগ্ৰিদা তম্বা নূপীমচা মহৈরোয় মাপন্না থাঙ্গৎলকখিবা প্লি অমগী হিয়ারিং বোম্বে হাই কোর্টতা চত্থরকপা মতাং অমদা চুম্বর ট্রোম্বে ইদুকেসন সোসাইটি কৌবা অমনা চল্লাইবা এন জি অচার্জা এন্দ দি কে মরাথি কল্লেজগী মেনেজমেন্ট না কোর্ট অদুদা আরগুমেন্ট অদু পীখিবনি।

মুসলিম মহৈরোয়শিংনা কল্লেজ অদুগী কেম্পসকি মপান্দা ধর্মগা মরী লৈনবা ফীজোল শীজিন্নবদা থিংবা লৈতে, তৌবতবু কেম্পস মনূংদদি কল্লেজ অদুগী তোপ-তোপ্পা শক্তম অমা ঙাক্ননবা রুল শেম্লিবদু ঙাক্না চৎফম থোকপনি হায়বা ৱাফম কল্লেজ অথোরিটিগী মায়কৈদগী থমখি। লাক্লিবা জূন ২৬ তা হীরম অসীগী মতাংদা কোর্ট অসীনা ওর্দর অমা তাগদৌরি।নাকল অমরোমদা, কল্লেজ অথোরিটিগী থৌওং অদুনা মুসলিম কাঙলূপকি চৎনবীগী দ্রেসতা খূৎ থিংজিনবা ওইনা থোক্লে, মদু আইন অমসুং কন্সটিট্যুসনগী মায়োক্তনি হায়না মুসলিম মহৈরোয়শিং অদুনা মখোয়গী প্লি অদুদা ফোঙদোকখি।