হান্নগী প্রাইম মিনিষ্টর রাজিব গান্ধী গী মপোক কুমওন থৌরম পাঙথোকখ্রে

লৈবাক অসীগী হান্নগী প্রাইম মিনিষ্টর রাজিব গান্ধীগী ৮০ শুবা মপোক কুমওন থৌরম ইন্দিয়াগী মফমশিং শীন্থুং পাঙথোক্নবগুম মনিপুরদসু ইম্ফাল দা লৈবা কংগ্রেস ভবন্দা এম পি সি সিনা শীন্দুনা নীংশীং থৌরম পাঙথোকখ্রে। সদভাবনা দিবস হায়না মিংথোন্দুনা বির টিকেন্দ্রজিৎ রোদতা লৈবা কংগ্রেস ভবন্দা এম পি সি সিগী লুচিংবশিং, কংগ্রেস কি এম এল এ শিং অমসুং মশীং য়াম্লবা থৌমীশিংনা শরুক য়ারদুনা লৈখিদ্রবা প্রাইম মিনিষ্টর অসীগী মিটমদা ঈকায় খুম্নবা ঊৎলদুনা লৈ-শূ কৎনখি।

থৌরম অদুদা শরুক য়াখিবা কংগ্রেস লিদর ওক্রম ইবোবিনা রাজিব গান্ধীবু শীংথারদুনা ৱাফম কয়া ফোঙদোকখি। হান্নগী প্রাইম মিনিষ্টর অসীনা ইন্দিয়াবু সাইন্স অমসুং টেক্নোলোজিগী হীরমদা অমদি ইনফোর্মেসন টেক্নোলোজিগী হীরমদা মালেমগী চাওখৎখ্রবা লৈবাকশিংগী মরক্তা লম্বা তৌনবা ঙমহন্নবা অশানবা মীৎয়েংগা লোয়ননা চোকথবা নাইদনা হোৎনরম্মি হায়বা ৱাফম মনিপুরগী হান্নগী চিফ মিনিষ্টর অমসুং কংগ্রেস লেজিসলেচর পার্টিগী লুচিংবসু ওইরিবা ইবোবিনা মখা তানা ফোঙদোকখি।

ইন্দিয়া অসী মালেমদা অচৌবা লৈবাক অমা ওইনা লৈজরবসু অতৈ অতৈ অচৌবা লৈবাকশিংনা অপীকপা লৈবাকশিংবু য়োৎশিন্ননবা হোৎনরিবা অদুগী ওন্ন-তৈনবদা ইন্দিয়ানা য়ূমথংনরিবা লৈবাকশিংগা অফবা মরী থম্ননবা ঙসীফাওবা হোৎনদুনা লাক্লি। শ্রিলঙ্কাদা এল টি টি ঈগী ঈরাং লৈহন্দনবা, নুংশি-চান্ননা লৈমিন্ননবা ইন্দিয়ান পিস কিপ্পিং ফোর্স ফাওবা থাজিনখিবগীদমক এল টি টি ঈনা প্রাইম মিনিষ্টর অসীবু হাৎখিবদু মালেমগী ওইনা মেনখৎপা ঙম্লরোইদবা মাঙজবা অমনি হায়না ইবোবিনা ফোঙদোকখি।