হান্নগী চিফ মিনিষ্টর রিশাং কৈশিং লৈখিদবগী তরেৎশুবা কুম্মোন থৌরম পাঙথোকখ্রে

মনিপুগী চিফ মিনিষ্টর ওইনা টার্ম অনীরক ওইরমখিবা কংগ্রেস লুচিংবা রিশাং কৈশিং লৈখিদবগী তরেৎশুবা কুম্মোন থৌরম থা অসীগী ২২ দা মনিপুর প্রদেস কংগ্রেস কম্মিটিনা শীন্দুনা ইম্ফালগী বির টিকেন্দ্রজিৎ রোদতা লৈবা কংগ্রেস ভবন্দা পাঙথোকখ্রে।এম পি সি সিগী প্রসিদেন্ট কে মেঘচন্দ্র, সি এল পি লিদর ওক্রম ইবোবি, সি দব্লিয়ু সিগী মেম্বর গাইখাঙম, কংগ্রেস পার্টিগী এম এল এশিং, এক্স- এম এল এ শিং অমসুং পার্টিগী লুচিংবা কয়ানা থৌরম অদুদা শরুক য়াখিবগা লোয়ননা লৈখিদ্রবা লুচিংবা অসীগী ফোতোদা লৈ-শু কত্তুনা ইকায়খুম্নবা ঊৎখি।

লৈখিদ্রবা লুচিংবা অসীগী তরেৎলকশুবা কুম্মোন থৌরম অদুদা শরুক য়াখিবা কংগ্রেস লেজিসলেচর পার্টিগী লুচিংবা ওক্রম ইবোবি না ৱাফম কয়া থম্লদুনা হায়, রিশাং কৈশিংনা মনিপুরদা য়েলহৌঙৈদগী খুন্দামিন্নদুনা লাক্লিবা কাঙলূপশিংগী অপূনবা শক্তম শাগৎনবা, নুংশি- চান্ননা লৈমিন্ননবা পুন্সিচূপ্পা হোৎনরমখি। মরম অসীনা মহাক্কি ৱাখল্লোন অমসুং থবকশিং অদূ ঙসীগী মৈশা লাংলবা ঈরমদম অসীদা ঐখোয় খূদীংমক্না ঙাক্না চৎলবদি কাঙলূপশিংগী মরক্তা নুংশি- চান্ননা হিংমিন্নবা ঙমগনি হায়খি।

মনিপূরদা হৌজিক থোক্লিবা হীংশাগী ঈরাং অসী অথূবা মতমদা লোইশিন্ননবা হোৎনবদা ঐখোয় পূম্নমক্কি থৌদাং লৈরি। চীঙ-তম অনীমক্তা লৈরিবা, পায়নরিবা খূৎলায়শীং অসী ঙম্নমক লৌখৎপা মতমদা ঈরাং অসী মশানা মরোমদোম লেপহনবা য়াগনি হায়না ইবোবিনা মহাক্কি ওইবা ৱাফম ফোঙদোকখি।