হন্দক পাঙথোক্কদৌরিবা জেনরেল বদজেট-২০২৪-২৫ অসীগী মাঙোইননা য়ুনিয়ন ফাইনান্স অমসুং কোরপোরেট এফ্যের্স মিনিষ্টর নির্মালা সিতারমন্না চ্যের লৌদুনা ন্যু দিল্লিদা অহানবা ওইনা প্রি- বদজেট কন্সল্টেসন মীফম পাঙথোকখ্রে। মরুওইবা ইকোনোমিস্ট কয়ামরুমসু শরুক য়াখিবা মীফম অদুদা য়ুনিয়ন মিনিষ্টর ওফ ষ্টেট ফোর ফাইনান্স পঙ্কজ চৌধরী, য়ুনিয়ন ফাইনান্স সেক্রেটারি, ইকোনমিক এফ্যের্স, রেভিন্যু, ফাইনান্সিয়েল সর্ভিসেস এন্দ কোরপোরেট এফ্যের্স নচিংবা দিপার্টমেন্টশিংগী সেক্রেটরিশিং অমসুং চিফ ইকোনমিক এদভাইজরনচিংবা য়াওনা খন্ন-নৈনখি।
অহানবা প্রি- বদজেট কন্সল্টেসন মীফম অমা মকোকথোংবা ইকোনোমিস্ট কয়ামরুমসু শরুক য়াদুনা পাঙথোকখ্রে, লোয়ননা হন্দক পাঙথোক্ক দৌরিবা জেনরেল বদজেট মীফম অসীগী মতাংদা য়াম্না কূপ্না খন্ন-নৈনখি হায়না প্রি- বদজেট কন্সল্টেসন মীফম অদুদা শরুক য়ারুরবা মতূংদা ইকোনোমিস্ট অস্বনি মহাজন্না এজেন্সিদা ফোঙদোকখি। জেনরেল বদজেট অসী লাক্কদৌরিবা জুলাই থা অসীগী অনীশুবা চয়োলদা মিনিষ্টর নির্মালা সিতারমন্না প্রজেন্ট তৌরবা য়াই হায়না পানরিবনি ।
য়ুনিয়ন ফাইনান্স মিনিষ্টর নির্মালা সিতারমন্না হন্দক পুথোক্কদৌরিবা জেনরেল বদজেট অসি থারগা মহাক্না পরীং কায়দনা, মরক্তা অতোপ্পনা থৎলুবা অমত্তা য়াওদনা প্রজেন্ট তৌরকপগী ওইনা বদজেট অসিনা তরেৎলক শুবা ওইগদৌরিবনি। কন্সিক্যুটিব ওইনা মমাঙদা ফাইনান্স মিনিষ্টর ওইরম্বা মোরাজি দেসাইনা বদজেট মথং মথং তরুকলক পুথোক্তুনা থমখিবা রেকোর্দ অদু সিতারমন্না থুগাইরগনি হায়না পানরিবনি। টার্ম অনিরক থংননা ফাইনান্স মিনিষ্টরগী ফম পুবা নূপী মিনিষ্টর নির্মালা সিতারমন্না ওইদুনা লৈবাক অসীগী সেন্টর লৈঙাক্কি ওইনসু মহাক্না অহানবা রেকোর্দ থম্বা ঙম্লিবিনি।
