মনিপুর লৈঙাক্কি মখাদা লৈরিবা এক্সসাইজ দিপার্টমেন্টগী ষ্টাফশীং অমদি ওফিসিয়েলশিংনা মথৌ পাঙথোকপদা হেন্না খূৎলোয়ননবা, আইন্না য়াদবা মওংদা লিক্কর অমদি অতৈ নিষাগী পোৎলমশিং পুথোক-পুশিন তৌবা মীওইশিং তান্নদুনা ফাগৎপা ঙম্ননবা য়াম্না অয়াঙবা মখলগী মহীন্দ্র বোলেরো কেম্পর (পীক-অপ) বেহিকল মঙা, চিফ মিনিষ্টর য়ূম্নাম খেমচান্দনা খূৎশীন্নরদুনা, ঙরাং চিফ মিনিষ্টরগী বাংলো মমাঙদগী লমথাখ্রে। গারিশিং অদূ নিষাগী পোৎলমশিং পুথোক-পুশিন তৌবা, আইনগী মায়োক্তা লৈবা মীওইশিং কোয়তান তান্নদুনা ফাগৎপা ঙম্ননবনি হায়না চিফ মিনিষ্টরনা ফোঙদোকখিবগা লোয়ননা মনিপুর লৈঙাক্না নিষাগী মায়োক্তা চঙশীল্লক্লিবা কেম্পেইনশিং হেন্না কনশীলহল্লগনি হায়খি।
মনিপুর লৈঙাক্কি মখাদা লৈরিবা এক্সসাইজ দিপার্টমেন্টগী ইনফ্রাষ্ট্রকচর অমসুং মেনপাৱর অসী মশীং য়াম্না হন্থনা লৈরি। দিপার্টমেন্ট অসীদা অৱাৎপা ময়াম লৈবনা খুদোংচাদবশিং মায়োক্নরবসু হৌজিক লৈরিবা ষ্টাফ অমসুং ওফিসিএলশিংনা অখাঙ কনবা মতৌগা লোয়ননা হোৎনবদগী শীঙথানিঙায় ওইনা নিষাগী পোৎলমশিং ফাগৎলি, হৌজিক লৈরিবা দিপার্তমেন্ত অসীগী অৱাৎ-অপা খূদীঙমক মনিপুরগী অনৌবা পোপ্যুলর লৈঙাক অসিনা মেনখৎপিরক্লগনি হায়বগী অচেৎপা থাজবা লৈ হায়না দিপার্টমেন্ট অসীগী এসিষ্টেন্ট কম্মিস্নর এন জি রাজেস সিংহনা থৌরম অদুদা ফোঙদোক্লদুনা চিফ মিনিষ্টরগী মীৎয়েং চিংশিনখি।
নৌনা লৈরুরবা অয়াঙবা মখলগী গারিশিং অদূনা দিপার্টমেন্ট কি ওফিসিয়েলশিংদা অনৌবা, থবক হেন্না থৱায় য়াওনা তৌনিংবগী ইনোৎ অমা হাপকৎলগনি হায়না ফোঙদোকখি।ওপরেস্নেল কেপাসিটি অমদি এনফোর্সমেন্ট ইফিসিয়েন্সিসু হেনগৎহল্লগনি হায়না মহাক্না ফোঙদোকখি।
