মনিপুর লৈঙাক্না হন্দক হিল এরিয়াজ কম্মিটি (ঐচ এ সি) গী খূত্থাঙদা দিক্লারেসন অমা ইস্যু তৌদুনা এ দি সি তরুক্কি কা হেন্না মতম হেন্দোক্লবা ইলেক্সন পাঙথোক্ননবা হোৎনবগী মহূত্তা মরক্কি কম্মিটি অমা শেম্লগা এ দি সিশিং সাসন তৌননবা হোৎনরক্লিবা থৌরাং অসি য়াবা শূকঙম ঙম্লোই হায়না কুকি-জো কাঙলূপকি এম এল এ তরানা ফোঙদোকখিবগা লোয়ননা গভর্নর লক্সমন প্রসাদ অচারিয়াদা চেরোল পীশিন্দুনা হীরম অসীগী মতাংদা মীৎয়েং চঙবিনবা ৱাকৎখ্রে।
লৈঙাক্না ঙসিফাওবা মনিপুরদা লৈরিবা এ দি সি শিংগী ইলেক্সন পাঙথোক্ননবা হোৎনদনা, নমশীন্দুনা থম্লক্লি অদুগা অমরোমদনা ঐচ এ সিগী খূত্থাঙদা এ দি সিশিংগী চাওখৎ-থৌরাংগীদমক সেন্টরনা পীথরকপা য়াম্লবা ফন্দগী শেনফমশিং লৈঙাক অসীনা মখোয়গী খূৎচাবী মীওই খরদা শিন্নদুনা মনীং তম্না শায়েন-ঙায়েন্নবা য়াননবা পান্দমদা টেম্পরেরি কম্মিটি শেম্নবা থৌরাং তৌরকপনি হায়রি।
লৈঙাক অসিনা তম্পাক্কি পঞ্চায়েৎ এরিয়াশিংগী মীখলসু কা হেন্না মতম হেন্দোকখ্রবফাওবদা নমশীন্দুনা থম্লগা মখোয় মশেল ফন্দ শায়েন-ঙায়েন্নবা য়াননবা মরক্কি কম্মিটিশিং শেম্লগা সাসন চল্লাইরিবসি দিমোক্রেসি অমসুং কন্সটিট্যুসনবু খোঙ্গোইনবনি হায়বা ৱাফম কয়ামরুম কুকি-জো কাঙলূপকি এম এল এ তরানা গভর্নরদা পীশিনখিবা চেরোল অদুদা পল্লি হায়রি।
কুকি-জো কাঙলূপকি এম এল এ শিং অদুদি হাওখোলেট কিপগেন, ঙুরসাংলুর সনাটে, চিনলুন্থাং হাওকিপ, কিম্নিও হাওকিপ হংশিং, লেটপাউ হাওকিপ, পাউলিয়েনলাল হাওকিপ, এল এম খৌতে, লেটজামাং হাওকিপ, নেমচা কিপগেন অমসুং ভুংজাগিন ভাল্টে হায়রিবশিং অসিনি। মখোয়না মনিপুরদগী খাইদোক্লগা তোঙানবা য়ুনিয়ন টেরিটোরি অমা শেম্ননবা সেন্টরদা দিমান্দ তৌরিবা খোঙজঙ অদুসু হেন্না কন্সীল্লগনি হায়খি। গভর্নরনা মতেং পাংবিয়ু হায়নসু তকশীনখি।
