দোক্তর্স ৱিদাউট বোরদর্স না মীয়ামগী হকসেলগী থাক ৱাংখৎহন্ননবা প্রোগ্রাম কয়ামরুম পায়খৎলক্লি

দোক্তর্স ৱিদাউট বোরদর্স নত্রগা মেদিসিন্স সান্স ফ্রন্টিয়র্স হায়রিবা ইন্টরনেস্নেল গী থাক্তা লৈরিবা ওরগনাইজেসন অসীনা লমদম অসীগী মীয়ামদা, মরুওঈনা চহী অমগা থা অমা শুরক্লবা মনিপুরগী হীংশাগী ঈরাং অসীগী অকনবা চৈথেং নংলদুনা তোঙান তোঙানবা রিলিফ কেম্প কয়াদা চঙজফম লৌদুনা অৱাবা মায়োক্নরগা লৈরিবা ভিক্তিমশিংগী হকসেলগী ফীভম ফগৎহন্ননবা, নাদ-য়েক্তনা, মশা-মঊ ফনা লৈননবা পান্দমদা থৌরাং কয়ামরুম পায়খৎলক্লি।
হীংশাগী ঈরাং অসীগী অকনবা চৈথেং নংলদুনা তোঙান তোঙানবা রিলিফ কেম্প কয়াদা চঙজফম লৌদুনা লৈরিবশিং, ঈরাং অসীনা মরম ওইদুনা লমদম অসীগী মীয়াম্না চত্থোক চৎশীন তৌবদা খুদোংচাদবা কয়া লৈরিবা, পোৎ-চৈগী মমল কা হেন্না তাঙখৎলকপগী মথক্তা মরাং কায়না ফংলক্তবগী অমসুং অনা-লায়েংগা মরী লৈনবা হীদাক-লাংথক্কি পোৎলমশিং ফংলক্তবগী অৱাবা কয়া অসীদগী কোকহন্ননবা ওরগনাইজেসন অসীনা অকনবা থবক পায়খৎলক্লি হায়রি।
ওরগনাইজেসন অসীনা চহী অসীগী জনুয়ারি ১৫ দগী হৌরদুনা হকশেলগী খূদোংচাবা মপূংফানা ফংদনা লৈরিবা ইম্ফাল ইষ্ট, ইম্ফাল ৱেষ্ট, বিষ্ণুপুর, থৌবাল, ককচীং, চুরাচান্দপুর, তেংনৌপলনচিংবা দিষ্ট্রিক্টশিংদা লৈরিবা রিলিফ কেম্প কয়াদা চত্তুনা লেম্না হেল্থ কেম্প কয়া পাঙথোক্তুনা হীদাক- লাংথক্কি মতেং কয়া পাংবতা নত্তনা চীঞ্জাক্কি পোৎলমশিংশু পীদুনা লাক্লি হায়রি।