দেঙ্গী নারবা মীওই মশীং ৭০০ হেল্লে, নোংমদা মীওই ৩০ গী চাংদা পোজিটিব ওইরক্লি

মনিপুরদা দেঙ্গী নারবা মীওই মশীং নোংমা নোংমগী হেঙ্গৎলকপগা লোয়ননা ষ্টেট লৈঙাক্কি দিরেক্তরেট ওফ হেল্থ সার্বিসেসনা লায়না লাইচৎ অসী শন্দোরকপা থিংননবা অকনবা থবক পায়খৎপা হৌখিবগা লোয়ননা দেঙ্গী লায়না মশক খঙদোক্ননবা টেষ্ট তৌবগী অকনবা থবকশিং পায়খৎলক্লি।

টেষ্ট তৌবগী থবক্তা হেন্না খুদোং চাননবগীদমক কল্লেক্সন সেন্টরশিং হাংদোক্লবা মফমশিং লাউথোকখ্রে। হেল্থ সার্বিসেস কি দিরেক্তর ও সনাহনবিনা থাদোরকখিবা চেরোল অমগী মতূংইন্না, ইম্ফাল সিটিগী অকোয়বা মফমশিংদা দেঙ্গী লায়না শন্দোরকপগী চাং য়াম্না হেঙ্গৎলক্লি। মীয়ামগী খুদোংচানবগীদমক হাংদোকখ্রবা কল্লেক্সন সেন্টরশিং অদুদি ইম্ফাল ৱেষ্ট দিষ্ট্রিক্টকি ওইনা সগোলবন্দ অপ্পর প্রাইমারি হেল্থ সেন্টর, ক্বাককৈথেল হৌরোকচানবি, ইরোইসেনবা ময়ায় লৈকায়দা লৈবা য়ু পি ঐচ সি, লাঙ্গোল তরুং য়ু পি ঐচ সি, ক্বাকৈথেল থোকচোম লৈকায় য়ু পি ঐচ সি হায়রিবশিং অসিনি।

ইম্ফাল ইষ্টকি ওইনা খেত্রি ময়ায় লৈকায় য়ু পি ঐচ সি, মিনুথোং নাগারাম য়ু পি ঐচ সি, সেন্ট জোর্জ স্কুল ৱাঙ্খৈ মনাক্তা লৈবা শঙ্গাইপাৎ য়ু পি ঐচ সিনি হায়রি। চৎলিবা চহী অসীগী জানুয়ারি অমদগী চৎলিবা সেপ্তেম্বর থা অসীগী ২৭ ফাওবদা ষ্টেট অসীদা দেঙ্গী লায়না পোজিটিব ওইবগী অপূনবা মশীং অসী ৭০০ য়ৌখ্রে হায়রি।