কুকি- জো কম্যুনিটিনা মনিপুর থুগাইনবা, চিফ মিনিষ্টর শিন্দোক্ননবা হোৎনরকপদা এম এল এ খরনা শৌগৎপগুম থবক তৌরকপসি লাইবক থীবনি:দা.তোম্বী

মনিপুরবু মচেৎ তানা থুগাইনবা অমসুং চিফ মিনিষ্টর এন বিরেন লৌথোক্ননবা চিন- কুকি- জো কম্যুনিটিনা চত্থরক্লিবা থৌওং অসীগী মায়োক্তা লমদম অসীগী মীয়াম্না অমত্তা ওইনা খূৎশম্নরগা থেংনরিঙৈ চৈরকশিদা ঐখোয়গী এম এল এ, মিনিষ্টর খরনা চিফ মিনিষ্টর লৌথোক্ননবা সেন্টরগী লুচিংবশিংগী মখোঙ কোন্দুনা তুমিন্না লোবি চত্থনবগী থৌওং অমা উবা ফংলিবসি য়াম্না লাইবক থীবনি। এম এল এ, মিনিষ্টর খরনা দিল্লিদা লোন্না-লোন্না চঙশীন্দুনা চিফ মিনিষ্টর শিন্দোকপিননবা হোৎনরি হায়বসি মনিপুরগী মীয়াম্নসু চপচানা খঙলিবা, উরিবা ঙাক্তনি, মীয়াম অসী করিসু খঙলম্লোই হায়না খনবিগনু হায়না সিব সেনা মনিপুর ষ্টেটকি প্রসিদেন্ট দা. মোইরাংথেম তোম্বীনা অকনবা ৱাফম ফোঙদোকখ্রে।

চৎলিবা থা অসীগী ২৬ তা ইম্ফালগী বাবুপরাদা লৈবা সিব সেনা ষ্টেট য়ুনিটকি ওফিসতা পাঙথোকখিবা পাউমীশিংগা উনখিবা থৌরমদা মহাক্না ৱাফম অসী ফোঙদোকখিবনি।তোম্বীনা মখা তানা, চিফ মিনিষ্টর শিন্দোক্লগা কুকি- জো কাঙলূপ্না ঈরমদম অসীবু থুগাইনবা চত্থরক্লিবা থৌরাং অসি মায় পাকহনখ্রসি হায়রিব্রা হায়না মরী লৈনবশিংদা হংখি।

হন্দক মহাক্না দিল্লিদা থাখায় অমা চূপ্না লৈরমখিবা মতমদুদা করম্বা মনিপুরগী এম এল এ, মিনিষ্টরশিং লাক্লগা য়ুনিয়ন হোম মিনিষ্টর য়াওনা অতৈ লুচিংবশিংগা উনদুনা চিফ মিনিষ্টর লৌথোক্ননবা হোৎনখিবগে হায়বদু ময়েক শেংনা খঙবা ঙম্মি। মদু মখাতানা তৌবিগনু, মতাঙ-মতম চাদনা ওইরোইদবদা ঈরাং থোক্ননবা থৌশিল পায়খৎলোইদবনি হায়খি।