কংগ্রেস লেজিসলেচর পার্টিগী লুচিংবা অমসুং মনিপুরগী হান্নগী চিফ মিনিষ্টর ওক্রম ইবোবিনা ষ্টেট লৈঙাক্কি মথক্তা মরাল শীরদুনা, চহী অমদা এসেমব্লি মীফম ৩ লক কৌদবসি কন্সটিট্যুসনগী গাইদলাইন ঙাক্তবনি হায়না ফোঙদোকখিবা অমসুং প্রোসিদ্যুর থুগাইবনি হায়খিবদু য়াম্না লানবা অমসুং য়ূম্ফম য়াওদবা অমনি হায়না মনিপুরগী ইদুকেসন অমসুং লো এন্দ লেজিসলেটিব এফ্যের্স মিনিষ্টর থৌনাউজম বসন্ত কুমারনা ফোঙদোকখ্রে। বোর্দ ওফ সেকেন্দরি ইদুকেসন মনিপুর (বোসেম) গী চ্যেরমেন ওইনা লৈরিবা অখাম জয়কুমার মতীক চারে হায়দুনা লৈঙাক্না এপ্পোইন্ট তৌরিবনি, শিন্দোকপগী মথৌ তাদে হায়নসু মিনিষ্টর অসিনা ফোঙদোকখ্রে।
ইম্ফালগী কৈশাম্পাৎ জঙ্কসন্দা লৈবা দিরেক্তরেট ওফ ইনফোর্মেসন এন্দ পব্লিক রিলেসন্স (দি আই পি আর) গী হোলদা পাউমীশিংগা উনবদা ঙরাং মিনিষ্টর বসন্তকুমারনা ৱাফম অসী ফোঙদোকখিবনি। মহাক্না হায়, মনিপুর এসেমব্লিগী রুল ওফ প্রোসিদ্যুর এন্দ কন্দক্ট ওফ বিজিনেসকি মতূংইন্না চহী অমদা এসেমব্লি মীফম ৩ লক ফম্বগী ৱাফম অসী লৈজরবসু কন্সটিট্যুসনগী মতূংইন্না হায়বদি আর্টিকল ১৭৪ না চহী অমদা এসেমব্লি মীফম ২ রক্তগী তাদনা ফমগদবনি হায়রি। অনীরক এসেমব্লি মীফম পাঙথোকপা হায়বসি ইন্দিয়ান কন্সটিট্যুসনগী প্রোভিজন থুগাইবা নত্তে, কন্সটিট্যুসনগী মেন্দেটনি। এসেমব্লিগী রুল ওফ প্রোসিদ্যুর এন্দ কন্দক্ট ওফ বিজিনেসকি মথক্তা কন্সটিট্যুসনগী মেন্দেট লৈরিবনি। মরম অসিনা ষ্টেট লৈঙাক্না কন্সটিট্যুসনগী গাইদলাইন খোঙ্গাওনরে হায়রিবসি অরানবনি হায়খি।
কংগ্রেস লৈঙাক মতমদা কুমশিং ২০০৩,২০০৭,২০০৮,২০০৯ অমসুং ২০১৬ দা এসেমব্লি মীফম অনীরকখক্তমক ফমখিবদু নীংশীফম থোকই হায়খি।বোসেমগী চ্যেরমেন অসিসু কোসেমগী চ্যেরমেন গুম্না মশাগী চহী ৬৫ ফাওবা লৈঙাক্কি থবক পুবা য়াবগী অয়াবা ষ্টেট লৈঙাক্কি কেবিনেট মীফম্না হান্ননা ৱারেপ লৌখ্রবনি। অখাম জয়কুমার মতীক চারে হায়দুনা লৈঙাক্না এপ্পোইন্ট তৌরিবনি। মরম অসিনা বোসেমগী এমপ্লোয়িশিংনা য়ূম্ফম য়াওদনা সিজ ৱার্ক ষ্ট্রাইক, পেন দাউন ষ্ট্রাইক চত্থরক্লিবসি খূদক্তগী হন্দোকপিয়ু, মহৈরোয়শিংগী ইন্টরেষ্ট তা থবক তৌবা হৌবিরো হায়না খঙহনখি।
