কংগ্রেস না পঙাঙ ঙাঙদুনা ঈরাং অসীদা পোলিটিকেল মাইলেজ লৌনবা হোৎনবনা কান্নবা লৈরোই, সেক্যুরিটিগী মীফম পাঙথোকপদা সি এম য়াওদবদা করি অকায়বা লৈবগে: গোবিন্দাস

হৌখিবা নিংথৌকাবা নুমিত্তা ন্যু দিল্লিগী নোরথ ব্লোক্তা য়ুনিয়ন হোম মিনিষ্টর অমিট সহানা চ্যের লৌদুনা পাঙথোকখিবা হোম এফ্যের্স মিনিষ্ট্রিনা শীনখিবা মীফম অদুদা মনিপুরগী চিফ মিনিষ্টর নোংথোম্বম বিরেন করিগী য়াওহনখিদবনো হায়দুনা কংগ্রেস পার্টিনা মথৌ অমা ওইনা পঙাঙ ঙাঙলিবসি ওপোরচুনিষ্ট কি থৌওং চত্থরকপনি হায়না লৌই। করিসু লৈতবা ৱাফমদা ঈরাং শাগৎনবা হোৎনদুনা পোলিটিকেল মাইলেজ লৌনবা হোৎনবনা কান্নবা ফংলোই। মীফমদুদা চিফ মিনিষ্টর য়াওদবা য়াদে হায়বা ৱাফম করিসু লৈতে মরমদি মদু সেক্যুরিটিগী মীফম অমনি, মথৌ তাবা দি জি পি, সেক্যুরিটি এদভাইজর, চিফ সেক্রেটরিনচিংবা মকোকথোংবা ওফিসিয়েলশিং মীফমদুদা শরুক য়াখি হায়না মনিপুর লৈঙাক্কি ৱার্কস মিনিষ্টর গোবিন্দাস কোন্থৌজম্না অকনবা ৱাফম ফোঙদোকখ্রে।

ইম্ফালগী থম্বাল শঙলেন্দা পাঙথোকখিবা পাউমীশিংগা উনখিবা থৌরমদুদা মহাক্না ৱাফম অসী ফোঙদোক্লদুনা হায়, মনিপুরদা চহী অমা হেঞ্জিল্লক্লবা ঈরাং অসী মতৌ করম্না লোইশিনগদগে হায়বগী মতাংদা হোম এফ্যের্স মিনিষ্ট্রিগী মীফম পাঙথোক্তুনা খন্নবনি, লেজিসলেটরশিংগী মীফম নত্তে।

মসীদা নো-কনফিদেন্স থাঙ্গৎপা থাঙ্গত্তবগী ৱাফম ফাওবা কংগ্রেস পার্টিনা পুশিল্লক্লিবসি য়াম্না নোক্নিংবা ফাওই হায়খি।ঈরাং মরকশিদা পোলিটিকেল মাইলেজ লৌহৌদবা য়াদে হায়রগদি তৌগদবা থবক্তু হীরম অসীদা কান্নদবদা চঙশীনবগী মহুত্তা লৈঙাক্তা ওইথোকপা য়াবা, থবক্তা ওন্থোকপা য়াগদবা, ফজবা সজেসন পীবীয়ু হায়খি।