হন্দক পাঙথোকখিবা ১৮ শুবা লোক সভা মীখলদা ইন্নর মনিপুর পারলিয়ামেন্টরি কন্সটিট্যুয়েন্সিদা চাউনা মায় পাকখ্রবা কংগ্রেস কি এম পি দাক্তর অঙোমচা বিমোল অকোয়জম অমসুং আউটর লোক সভা সিট্টা মহাক্কি নক্নবা লম্বাদগী য়াম্না লাপ্না হেঙ্গৎলগা চাউনা মায় পাকখ্রবা কংগ্রেস পার্টি অসীমক্কি এম পি ইলেক্ট অলফ্রেদ কাঙম অর্থর অনী হৌজিক ন্যু দিল্লিদা লৈখিবগা লোয়ননা ঙসিদগী হৌগদৌরিবা তরানিপানশুবা লোক সভা অসীগী অহানবা পারলিয়ামেন্ট সেসন অসীদা শরুক য়াদুনা মনিপুরগী হৌজিক মায়োক্নরগা লৈরিবা ঈরাং অসীগী মতাংদা অকনবা ৱাফম কয়ামরুম পুখত্তুনা ঈরাং অসী লোইশিলহন্ননবা অচেৎপা ফীরেপকা লোয়ননা শেম শাদুনা লৈখ্রে।
লোক সভাগী অহানবা সেসন অদু ঙসীদগী হৌরগনি অদুগা রাজ্য সভাগী মীফম্না চৎলিবা থা অসীগী ২৭ তগী হৌগদবনি। মনিপুরদগী এম পি ওইনা মীয়াম্না ভোৎ কাহনখিবা মমাঙগী এম পিশিংনা দিল্লি য়ৌদুনা পারলিয়ামেন্ট দা ফমখ্রবা মতমদা মনিপুরগী ইস্যু পুখত্তুনা লৈঙাক্কি মীৎয়েং চিংশিন্ননবা হোৎনবদি লায়রদনা মনীংথংবা, মীনা উরোইদবা সিটতা ফম্লগা সেসন লোইবা ঙাইদুনা হক্কাম ৱা ৱা চন্দুনা ফমখৈ ফম্লগা হল্লকখিবগী মতৌ অদু হন্দক্তি লৈহল্লরোই হায়রি।
খুদোংচাবা তাঞ্জা অমত্তা নান্থোকহন্দনা মতীক চাবা পাউখুম ফংদ্রিফাওবা মনিপুরগী ইস্যু অসীগী মতাংদা তোঙান তোঙানবা মোসন কয়ামরুম পুখত্তুনা পারলিয়ামেন্ট থক থক নীকহনগনি অদুগা মনিপুরগী হীংশাগী ঈরাং অসীগী মতাংদা লৈঙাক্কি নাকোং শীংজা য়ৈনা তাহনগনি হায়না এম পি সি সিগী প্রসিদেন্ট কৈশাম মেঘচন্দ্রনা পাউমীশিংদা ফোঙদোকখি। মদুমক থবক্তা ওন্থোক্কনি হায়নসু কংগ্রেস কি এম পি অনীমক্না চপ মান্ননা ফোঙদোরক্লি।
