হন্দক পাঙথোকখিবা ১৮ শুবা লোক সভা মীখল অসীদা ইন্দিয়া ব্লোকনা মপূংফানা শৌগৎলদুনা মীরেপ ওইনা লম্বা থেংনখিবা কংগ্রেস পার্টিগী মীরেপ অনী তরাম্না ওকপগী থৌরম অমা ঙরাং ইম্ফালগী বির টিকেন্দ্রজিট রোদতা লৈবা কংগ্রেস ভাবন্দা মীয়াম্না শরুক য়াদুনা পাঙথোকখ্রে। হন্দক মায় পাক্লকখ্রবা কংগ্রেসকি মীরেপ অনী অদুদি আউটর মনিপুর পারলিয়ামেন্রি কন্সটিট্যুয়েন্সিদা অলফ্রেদ কানঙম এস অথর অমসুং ইন্নরগী লোক সভা কন্সটিট্যুয়েন্সিদা দা. অঙোমচা বিমোল অকোয়জমনি।
ভেটরান পোলিটিসিয়ান ওক্রম জয়না মখোয় অনীগী খূৎ পায়দুনা ৱাংনা থাঙ্গৎখিবগা লোয়ননা মায় পাক্লে হায়বা ঊত্তুনা অপেনবা ফোঙদোকখি। ইন্দিয়া ব্লোক্তা য়াওরিবা তোঙান তোঙানবা পোলিটিকেল পার্টি শিংগী লুচিংবশিংশু থৌরম অদুদা শরুক য়াখি। মখোয় অনীদা খূদোলপোৎ কয়ামরুম পীদুনা ঈকায়খুম্নবসু ঊৎখি।
থৌরমদুদা ৱা ঙাঙবদা সি এল পিগী লীদর ওক্রম ইবোবিনা হায়, মনিপুরদা হৌখিবা চহীগী মে অহূমদগী চত্থরক্লিবা হীংশাগী ঈরাং অসী সেন্টরনা থম্মোয় শেংনা লাকশীন্ননবা হোৎনরবদি নোংমা-নীনীদা লোইশিনবা ঙমগদবা পোৎ অমখক্নি অদুবু সেন্টরনা থওইনা তৌরগে মতাগুম খঙশীন- উশিন্নদনা লৈবদগী ঈরাং অসী ঙসীফাওবা লোইশিনবা ঙমদ্রিবনি। হাত্তোক্নরসনু হায়বদুমক্নি হৌজিক লৈরিবা থাক অসী।মালেমদা দিফেন্সকি শক্তিদা মঙাশুবা থাক্তা হাইগৎলক্লিবা ইন্দিয়ানা মনিপুরগী ঈরাং লাকশিন্দনা ঙসীফাওবা থম্লিবগী মরমদু ঐখোয়না খঙনরবা ঙাক্তনি। মীটৈ ফূরূপ তুম্না মাঙখ্রসনু হায়বগী শরৌ শীল্লকপা ওইনা তৌরব্রা হায়বগী চিংনবা ফাওরে হায়খি।
