বি জে পি অমসুং মসীগা মপাং ওইনা চৎলিবা কাঙবূনা মীয়ামদা নমথাক কয়ামরূম তৌদুনা অমসুং লৈবাক অসিগী তোঙান তোঙানবা লাইনিং কাঙলুপশিংগী মরক্তা খাইবুং খাইবুং তানহন্ননবা চীরোল তৌরক্লিবা ময়াম অসিদগী ঐখোয় খূদীংমক্না চেকশীন্না লৈগদবনি অদুগা কন্সটিট্যুসন অমদি লৈবাক অসিগী দেমোক্রেতিক ষ্ট্রকচরশিং মচেৎ মচেৎ তানা থুগাইনবা হোৎনরিবা অসী মায় পাকহল্লোইদবনি হায়না কংগ্রেস পারলিয়ামেন্টরি পার্টিগী প্রসসিদেন্ট সোনিয়া গান্ধিনা মীয়ামদা চেকশীন- ৱারোল থম্লকখ্রে।
মহাক্না মীয়ামদা পীখিবা ভিদিও মেসেজ অমদা ৱাফম অসি ফোঙদোকখিবনি। কংগ্রেস পার্টিগী ওফিসিয়েল এক্স প্লেটফোর্ম এক্কাউন্টদা থাদোরকখিবা ভিডিও মেসেজ অদুদা সোনিয়া গান্ধিনা হায়, লৈবাক অসিগী মীয়াম্না মশেক-মঙাল লৈবা, চাওখৎলবা ইন্দিয়াগী তুংলমচৎ অমগীদমক কংগ্রেস পার্টিদা শৌগৎপিদুনা ভোৎ পীনবিয়ু। প্রাইম মিনিষ্টর নরেন্দ্র মোদি অমসুং বি জে পিগী ইন্টেন্সন অমসুং পোলিসি অদুদা মীয়াম্না কূপ্না নৈনদুনা য়েংলবদি মখোয়না মীয়ামগী ইন্টরেষ্ট তুংওইননা থম্লমলগা পার্টিখক্কি ইন্টরেষ্টতা থবক তৌরি হায়বসি য়াম্না লায়না খঙবা ঙমগনি। ওটোনোমস বোদিশিং অমসুং কন্সটিট্যুস্নেল ইন্সটিট্যুসন খূদিংমক বি জে পিগী খূদোম্বীদা পুদুনা চৎলি। মখোয়না দিক্তেটরশীপ লৈঙাক অমা চল্লাইদুনা মেদিয়াফাওবা মচীন মেনবগী থৌওং কয়ামরূম চত্থরক্লিবনি হায়খি।
লৈঙাক্কি মায়োক্তা কনাগুম্বা মীওই অমত্তনা ৱাফম অমত্তং ফোঙদোক্লুবদা জেলদা নমশীন্দুনা থম্বগী চৎনবী অমসু বি জে পিনা চত্থরক্লি হায়খি।লৈবাক অসিগী তোঙান তোঙানবা নূপীশিং, অঙাং, নহারোল, দলিটশিং অমসুং মাইনোরিটিশিংগী মথক্তা মহৌশা অমুক্তা থেংনখিদ্রিবা মওংদা অত্যচার কয়া চৎথরক্লি। মসীদগী ঐখোয় পুম্নমক চেকশীনবা মথৌ তারি হায়না মহাক্না থমখি। দিক্তেটরশীপ লৈঙাক অমা ওইনা বি জে পিনা চল্লাইদুনা লৈবাক অসি ভূৎ-প্রেটকি লমদম অমা ওইরক্লি হায়না কংগ্রেস পারলিয়ামেন্টরি পার্টিগী প্রসসিদেন্ট অসিনা মখা তানা ফোঙদোকখি।
