কম্বাইন টিম্না সর্স ওপরেসন চত্থবদা য়াম্লবা খূৎশূ-খুৎলায়শিং ফাগৎপা ঙমখ্রে

থৌবাল দিষ্ট্রিক্কি মনূং চন্না নোংপোক সেকমাই পুলিস ষ্টেসন্না কোনবা ফূঙ্গরৈ চীঙদা কম্বাইন সেক্যুরিটি ফোর্সকি টিম্না থি-হুম্বগী থবক চত্থবদা মশীং য়াম্লবা খূৎশূ- খুৎলাই কয়ামরূম ফাগৎপা ঙমখ্রে হায়রি।
থা অসিগী ২০গী অয়ূক অঙনবদা শকখঙদবশিংনা ফূঙ্গরৈ চীঙদা খূৎশূ- খুৎলাই কয়ামরূম লোত্তুনা থম্লি হায়বা অকক্নবা পাউ অমা ফংবদগী থৌবাল দিষ্ট্রিক্ট পুলিসকি সেনিয়র সুপরীন্টেন্দেন্ট ওফ পুলীসকি মীৎয়েং মখাদা থৌবাল পুলিস কম্মান্দো, নোংপোক সেকমাই পুলিস ষ্টেসনগী পুলিস টিম অমসুং কুন্থরাহুমদোইশুবা আসাম রাইফলসকি কম্বাইন টিম্না চঙশীন্দুনা ফূঙ্গরৈ চীঙদা ওপরেসন চত্থখিবগা লোয়ননা এরিয়া দোমিনেসনগী থৌওং অমসু চত্থরকখিবনি হায়রি। ঙরাং অয়ূক ফাওবা মেটাল দিটেক্টরশিং শীজিন্নদুনা ওপরেসন অদু য়াম্না চেকশিন্না চত্থখি হায়রি।
শকখঙদবশিংনা লোত্তুনা থম্লম্বা, লানগী মতমখক্তদা শীজিন্নগদবা য়াম্লবা খূৎশূ- খুৎলাই কয়ামরূম ফাগৎপা ঙমখিবনি। ওপরেসন অদুদা মেগজিন য়াওবা ইন্সাস রাইফল অমা, রাঈফল মখল অসীগী মরূ মঙা, পোইন্ট ৩৬ কি হেন্দ গ্ৰেনেদ অনী,ট্যুব লোঞ্চর অমা, ট্যার স্মোক সেল অমা, ষ্টন সেল নোর্মেল অমা, এন্টি রাইওট রববর বুলেট অনী অমসুং অতৈ খূৎশূ- খুৎলাই কয়ামরূম ফাগৎপা ঙমখিবনি হায়রি।