সি এম বঙ্গলো মমাঙদা নূপী শঙ্গু শঙ্গু য়োম্বগী মরম থিগৎলি : সি ঈ ও

মীওই কাঙবূ অমনা ঈলেকসন কেম্পেইন থিংবগী থবক চত্থরি হায়বদু সি ঈ ও মণিপুরদা থোইদোকপা পাউ অমত্তা লৈতে অদুগা চিফ মিনিষ্টর বঙ্গলোগী মমাঙদা হন্দক মরক নূপী শঙ্গু শঙ্গু য়োমশীন্দুনা লৈবা উরি, মদু ঈলেকসনগী মোদেল কোদ ওফ কন্দক থুগাইবগা মরী লৈনরিব্রা য়েংশিনবিয়ু হায়না থাঙ্গৎলকখিবা ৱাকৎকি মতাংদুগীদি মরী লৈনবা দিষ্ট্রিক্ট ঈলেকসন ওফিসার (দি ঈ ও) দা রিপোর্ট অমা পীরক্নবা খঙহনখ্রে হায়না মণিপুরগী চিফ ঈলেক্তোরেল ওফিসার (সি ঈ ও) প্রদিপ কুমার ঝানা ফোঙদোকখ্রে।
লমফেলপাত্তা লৈবা চিফ ঈলেক্তোরেল ওফিসার অসিগী ওফিসতা ঙরাং পাঙথোকখিবা, মীপূম খূদিংমক মীখলদা শরুক য়াননবা ঙরাংদগী সি ঈ ওগী ওফিসতগী হৌদোকখিবা সিগনেচর কেম্পেইন্দা শরুক য়ারদুনা প্রদিপ কুমার ঝানা ৱাফম অসি ফোঙদোকখিবনি। কেম্পেইন অদু হৌদোক্লবা মতূংদা পাউমীশিংদা সি ঈ ও অসিনা হায়, সি এম বঙ্গলো মমাঙদা নূপী শঙ্গু শঙ্গু য়োমশীন্দুনা নুংতিগী লৈরি, মদু জেনরেল ঈলেকসন মতমসিদা করি মোটিবতা য়োমশীল্লিবনো, মীখলগী মোদেল কোদ ওফ কন্দক থুগাইবগা মরী লৈনরিব্রা য়েংশিনবিয়ু হায়না কংগ্রেস পার্টিনা থাঙ্গৎলকখিবা ৱাকৎকি মতূং ইন্না মরী লৈনবা দিষ্ট্রিক্ট ঈলেকসন ওফিসারদগী রিপোর্ট অমা পীরক্নবা খঙহনখ্রে। রিপোর্ট অদুগী মতূং ইন্না মতীক চাবা এক্সন লৌখৎকনি। ইন্নর মণিপুর পারলিয়ামেন্টরি কন্সটিট্যুয়েন্সিদা মীরেপ ওইরিবা মীওই অমনা টি ভি প্রোগ্রাম অমদা মোদেল কোদ ওফ কন্দক থুগাইদুনা দেমোক্রেতিক ওইদবা ৱাফম ফোঙদোকখিবগী মতাংদা সি ঈ ওগী মায়কৈদগী লৌখৎফম থোকপা থবক লৌখৎলি হায়খি।
সি ঈ ও মণিপুরগী মরু ওইবা দ্যুটিদি মীখল অসিদা মীরেপ ওইরিবা খূদিংমক্কিদমক লেভেল প্লেয়িং ফীল্ড অমা শেম্বা হায়বসিনি হায়খি। কেন্দিদেট অমদা অকি অখঙ পীরে হায়বগী মতাংদা মহাক্না হায়, অকি অখঙ পীবগী ৱাফম খূদিংমক য়াম্না লূম্না লৌবগা লোয়ননা খুদক্তা সেক্যুরিতি পীননবা থৌরাং পায়খৎলি।