চাইনাগী হান্না দিফেন্স মিনিষ্টর ওইরম্বা লি শাংফু শেঞ্জা-থুমজাগী মরালদা পার্টিদগী তান্থোকখ্রে

চাইনাগী প্রসিদেন্ট সি জিনপিংনা লুচিংবা রূলীং কম্যুনিষ্ট পার্টিনা হৌখিবা শগোলসেন নুমিত্তা লৈবাক অসীগী হান্নগী দিফেন্স মিনিষ্টর জেনরেল লি শাংফুবু পার্টিদগী তান্থোকপগী ৱারেপ লৌখ্রে। মহাক শেঞ্জা- থুমজা চত্থরম্বগী মরালদা পার্টিদগী তান্থোকপনি হায়রি।
মহাক্কি মথক্তা প্রোজিক্যুসনগী প্রোসিদিংশিংসু লৌখৎপা হৌখ্রে । হৌখিবা শগোলসেন নুমিত্তা সি পি সিগী মীফম্না শাংফু (৬৬) বু পার্টিগী দিসসিপ্লিন ঙাক্তবা অমসুং চৎনরিবা লৈবাক্কি লো ইন্দবগীদমক পার্টিদগী তান্থোকপগী ৱারেপ লৌখিবনি হায়না ষ্টেট ন্যুজ এজেন্সিনা ফোঙদোকখি। পিপলস লিবরেসন আর্মীগী ওল ইম্পোর্টেন্ট রোকেট (মিসাইল) ফোর্স লুচিংবা ওইখিবা অমসুং খ্বাইদগী মকোকথোংবা দিফেন্স মিনিষ্টর ওইনা প্রসিদেন্ট সি জিনপিংনা খনখিবা লি শাংফু অসী মমাঙ চহীদা মাঙখিবগী থৌদোক লৈখি হায়রি। মদূগী মতূংদা মহাক্না শেঞ্জা- থুমজা চত্থরম্বগী অমসুং পার্টি অমদি লৈবাক্কি দিসসিপ্লিন ঙাক্তবগী মতাংদা মহাক্কি মথক্তা ইনভেস্টিগেশন চত্থরি হায়না মীয়াম মরক্তা নিনফুং-নিনফুং ঙাঙনদুনা লাকখিবনিসু।
সি পি সিদা খ্বাইদগী মকোকথোংবা ফম পায়দুনা লাকখিবা, ষ্টেট কাউন্সিল্লর ওইনা অমসুং সি জিনপিংনা লুচিংবা সেন্ট্রেল মিলিটরি কম্মিসনগী মেম্বর অমসু ওইনা থবক তৌরম্বা লিবু ২০ শুবা সি পি সিগী নেস্নেল কংগ্রেসতা দেলিগেট অমা ওইবগী ক্বালিফিকেসন্দগী লৌথোকখি হায়রি।