চাইনানা আরুনাচল প্রদেসকি মফম কুনথ্রাগী মমিং নৌনা থোঞ্জিন্দুনা ইন্দিয়াগী সেক্যুরিটি, সোভরেন্টিদা মখা তানা শীংনরক্লি

মতম কয়াগী মমাঙদগী হিমালয়ান নাইবর অমা ওইরিবা চাইনানা ইন্দিয়াগী সেক্যুরিটি অমসুং সোভরেন্টিদা শীংনদুনা খৎনবা হৌবগী থৌওংশিং চত্থদুনা লাক্লিবা অদুগী মখা চত্থরকপা ওইনা হন্দকসু ইনৌ নৌনা আরুনাচল প্রদেসকি লমদম ৩০ গী মমিং মখোয়গী ওইবা লোলদা থোঞ্জিন্দুনা ইন্দিয়াগী সেক্যুরিটি, সোভরেন্টিদা অচৌবা শীংনবগী থৌওংশিং চত্থরকখ্রে।

ইন্দিয়াগী এক্সটরনেল এফ্যার্স মিনিষ্টর এস জয়শঙ্করনদি মদু চাইনানা য়ূমথঙনরিবা ইন্দিয়াদা ঙাইহাক লৈতনা খৎনবা হৌরকখিবদুগী মচৎনি, মদুনা ঐখোয়গী সোভরেন্টিদা করিগুম্বা অমত্তা অকায়বা থোকহনবা ঙম্লোই, করিশু লৈবা ৱাফম নত্তে হায়না ফোঙদোকখ্রে। কনাগুম্বা মীওই অমনা নহাক্কী য়ূম অমসুং ইংখোল অদুগী মমীং ইনৌ নৌনা থোঞ্জিল্লকপা তারবদি মদু নঙোন্দগী মহাক্না মুল্লগা মীওই অদুনা লৌখিগদ্রা, মাগী ওইখিবা তারিব্রা হায়না জয়শঙ্করনা অরায়বা মওংদা ফোঙদোকখি।

চাইনানা কুইরবগী মমাঙদগী হৌনা থেংখাঙ কয়াদা, কান্নরোইদবা অমসুং ওইথোক্লোইদবা ইস্যু কয়া শাগত্তুনা খৎনবা হৌদুনা লাক্লি অদুবু মদু খূদীংমক্তা লৈবাক অসীনা থেংনদুনা মায় পাক্না মায়োক্নরগা লাক্লি। চাইনানা শাগৎলিবা মঙলানশিং ঐখোয়না কৈদৌনুংদা মঙফাওনহল্লোই। মালেমগী লৈবাক অমত্তানা ইন্দিয়াগী ইন্টরনেল এফ্যার্স অসিদা, ঙমখৈদা, সেক্যুরিটি অমসুং সোভরেন্টিদা শীংনরকপা য়ারোই। শীংনরকপা পূম্নমক মপূংফানা মায়োক্নবা ঙম্নবগীদমক্তা লৈবাক অসীগী মতীক চাবা পৱার অমসুং কেপেবিলিটি লৈজরি। ইন্দিয়া অসি ঙসিদী য়েক্নবনা এত্তেক তৌরক্লগা তুমিন্না খাঙদুনা, য়েংদুনা লৈগদবা লৈবাক অদু ওইখিদবা কুইরে হায়না মিনিষ্টরনা ফোঙদোকখি।