মনিপুরদা চঙশীল্লক্তুনা খুন্দাশিল্লরিবা চিন-কুকি কাঙলূপকি মীওইশিংদা সেন্টরনা অরানবা মওংদা পীশীনখিবা সেদ্যুল্ড ট্রাইব ষ্টেটস লৌথোকপিয়ু অদুগা মৈতৈ/মীটৈনা মতম কয়াগী মমাঙদগী তান্দুনা লাক্লিবা লেজিটিমেৎ ওইবা দিমান্দ অমা ওইরিবা, সেদ্যুল্ড ট্রাইব ষ্টেটস তা চলহনবিয়ু হায়বা দিমান্দ অদু থবক্তা ওন্থোকপিয়ু হায়না সোসিয়েল এক্তিভিষ্ট অমসুং পোলিটিসিয়ান মাহেশ্বর থৌনাউজম্না য়ুনিয়ন ট্রাইবেল এফ্যের্স মিনিষ্টর জুয়েল ওরামদা মেমোরেন্দম অমা পীশীনখ্রে।
ন্যু দিল্লিগী ৮-তালকোদা রোদতা লৈবা য়ুনিয়ন ট্রাইবেল এফ্যের্স মিনিষ্টর অসীগী রেসিদেন্সতা চত্তুনা মেমোরেন্দম পীশীন্দুনা ৱারী শান্নখিবা অদুদা সোসিয়েল জষ্টিস এন্দ এম্পৱারমেন্ট কি য়ুনিয়ন ষ্টেট মিনিষ্টর রামদাস বি অথৱালেসু লোয়নখি। মাহেশ্বর থৌনাউজম অসি রিপব্লিকান পার্টি ওফ ইন্দিয়া (আর পি আই) অথৱালেগী নেস্নেল জেনরেল সেক্রেটরি ওইনসু থৌ পুরিবনি।
ব্রিটিসনা মনিপুরদা পুশিল্লকখিবা চিন-কুকিশিংনা মতৌ করম্না মফম অসীদা খুন্দারকখিবগে হায়বদুগী ৱারীশিং মেমোরেন্দম অদুগী খূত্থাঙদা মাহেশ্বরনা ফোঙদোকখিবগী মথক্তা উনবগী থৌরম অদুদসু মখা তানা পাউদমখি। মমাঙদা লৈরম্বা, জুয়েল ওরামগী পোর্ট ফোলিও অদু পায়রম্বা য়ুনিয়ন মিনিষ্টরদসু মহাক্না অহানবা ওইনা মেমোরেন্দম অমা হীরম অসিগী মতাংদা পীশীনবা লৈখ্রবনি হায়নসু মাহেশ্বরনা মিনিষ্টরদা ফোঙদোক্লমখি।
