মনিপুরগী চিফ মিনিষ্টর নোংথোম্বম বিরেন্না পুরিবা আর্ট এন্দ কলচরগী মখাদা লৈরিবা ষ্টেট সেন্ট্রেল লাইব্রেরি ইম্ফাল অসী হৌজিক শিরুম- নারুম তৌদুনা লৈরে। হান্না মশীগী ষ্টাফ ২৮ লৈরম্বদগী থবক্কি মতম লোইরদুনা পোত্থানখিবা য়াওরকপদগী হৌজিক শুপ্নখক্কি ষ্টাফ ১২ খক্না চল্লাইদুনা য়াম্না ফিভম চাদনা লৈরে হায়রি।
হৌজিক লৈরিবা ষ্টাফ ১২ অসীগী মনূংদগী মঙাদি লাক্লিবা দিসেম্বর থা অমসুং মথঙ চহীগী অঙনবা শরূক্তা থবক তৌবগী মতম লোইরদুনা পোত্থাখ্রগনি। ফীভম অসীদা লৈঙাক্কি মায়কৈদগী লাইব্রেরি অসীগী অৱাৎপা ষ্টাফশিং হাপ্তুনা ফমশিং অসী মেন্সিন্ননবগী থৌরাং তৌবসু ঙসীফাওবা লৈতবনা সেন্ট্রেল লাইব্রেরি অসী মনীং হল্লকপগী থাক অমদা কূমথরক্লি হায়নরক্লি।
ষ্টেট সেন্ট্রেল লাইব্রেরি অসীগী মখাদা লৈরিবা দিষ্ট্রিক্ট লাইব্রেরিশিংসু মমীংখক্তগী ওইনা লৈরি। ইন্দিয়াগী অতৈ ষ্টেটশিংদদি লাইব্রেরি চাওখৎহন্ননবা লৈঙাক্না য়াম্না কন্না হোৎনরি হায়রবসু মনিপুরগী ওইনদি য়াম্না পূক্নিং নুংশিনিঙায় ওইবা থাক অমদা লৈরিবসি য়াম্না লাইবক থীবনি । হীরম অসীগী মতাংদা চিফ মিনিষ্টরনা অকনবা মীৎয়েং চঙবিদুনা অৱাৎপা ষ্টাফশিং অথূবা মতমদা মেনখৎপীদুনা লাইব্রেরি অসীগী ফীভম ফগৎহন্ননবা থৌরাং লৌখৎপীয়ু হায়নরক্লি।
