ইম্ফাল ইষ্ট দিষ্ট্রিক্টকি মনূংচন্না লৈবা লিবরেল কোল্লেজ, লূৱাংশঙবমদা ঙরাং চিফ মিনিষ্টর নোংথোম্বম বিরেন্না নুমিৎ নিনি চত্থগদবা মেগা রোজগার মেলা হৌদোকখ্রে। থৌরম অদুদা অথোইবা মীথূংলেন ওইনা শরুক য়াখিবা চিফ মিনিষ্টর অসিনা হন্দক নৌহৌননা মনিপুরগী স্কুল অমসুং কোল্লেজশিংগী অয়ুক্কি এসেমব্লিশিংদা ষ্টেট সোং অমসুং নেস্নেল এন্থেম শক-শোনবগী থৌরমশিং পাঙথোক্নরক্লিবা অসীদা থাগৎপগা লোয়ননা থৌওং অসীনা হৌগৎলক্লিবা নহারোলশিংদা মরৈপাক-মরমদম নুংশিবগী, অমত্তা ওইবগী ইথিল পীবতা নত্তনা নেস্নেলিজমগী ইহুল ফাওহল্লগনি হায়খি।
ঐখোয়না ঈমা-ঈপা, অহল-লম্মন, ওজা-গুরুশিং অমসুং ঈথক থোংবশিংদা ব্যেবহার তৌদুনা থকশী-খাশি মশক খঙনা লোয়নগদবনি। থকশী-খাশি মশক খঙদ্রবা, ব্যবহার য়াওদ্রবা খুন্নাই অমনা কৈদৌনুংদা চাওখৎ খোঙথাঙদা লাকপা ঙম্লোই হায়বা ৱাফম চিফ মিনিষ্টর অসীনা মীয়ামদা ফোঙদোকখি।
খুন্নাইগী অহোংবা অমসুং চাওখৎপা পুরকপদা নহারোলশিং, থোইদোক হেন্দোক্না মহৈরোয়শিংগী দাইত্য য়াম্না চাউই। মরম অসীনা খুন্নাইগী তুংগী য়ূম্বীরেল ওইগদৌরিবা ঙসীগি নহারোলশিংনা থকশী-খাশি, ব্যবহার ঙাকপা হায়বসি য়াম্না মথৌ তাই, মসী ঙাক্ট্রবদি ঐখোয়গী খুন্নাই অসী চাওখৎলকপদি লায়রদনা মনীং হল্লকপা তাবনি হায়না চিফ মিনিষ্টরনা ফোঙদোকখি। ষ্টেট অসীগী নূপী ওইবিশিংদা পাক শন্না স্কিল দেভলপমেন্ট ট্রেনিং পীদুনা মখোয়গী শেল-থুমগী ফিভম ফগৎহন্ননবা লৈঙাক্না অকনবা থবক পায়খৎলি হায়নসু মহাক্না ফোঙদোকখি।
