খুন্নাই অসিদা চয়েৎনবা কয়া শেংদোকপা ঙমদনা লৈরি। চয়েৎনবা ময়াম অসি শেংদোক্লবা মতূংদা মতীং লৈবা খুন্নাই অমা ওইহন্ননবা হোৎনগনি হায়না চিফ মিনিষ্টর নোংথোম্বম বিরেন্না ফোঙদোকখ্রে। বিষ্ণুপুর দিষ্ট্রিক্টকি মনুংদা লৈবা ফূবালা, সুনুসিফাই, নরানসৈনা, থম্নাপোকপীনচিংবদা লৈবা, হন্দক্কি অকনবা নোংলৈ- নুংশিৎ অমসুং অকনবা লেন্না মাঙ- তাকহনখিবা মফমশিংদা কোয়না চত্তুনা য়েংশিনখিবা অমদা চিফ মিনিষ্টরনা ৱাফম অসি ফোঙদোকখিবনি।
মফমশিং অসিদা লৈরিবা য়ূম অমসুং ইংখোল, লৌফমশিংদা হৌরিবা মহৈ- মরোং মাঙ- তাকখ্রবা মীওই কয়াগা উন্নদুনা ৱারী শান্নখিবা অমদা মহাক্না ৱাফম অসি ফোঙদোকখিবনি। হীংশাগী ঈরাং মায়োক্নদুনা খম থেংনা অৱাবা মায়োক্নরগা লৈরিঙৈ চৈরক্তা মহৌশাগী ওইবা খুদোংথীবা থৌদোক অসিনা লমদম অসিগী মীয়ামদা অমুক হেন্না অচৌবা চৈথেং মায়োক্নদুনা লৈরি । মসী ঐখোয় পুম্নমকপু মহৌশা কৌবী লাইরেম্বীনা চাংয়েং অমা তৌরিবনি হায়বা নীংশীংগদবনি হায়না চিফ মিনিষ্টরনা ফোঙদোকখি।
নোংলৈ- নুংশিৎ অমসুং লেন্না অমাঙ- অতা থোকহনখিবা খূদিংমক অসিগী চপ চাবা কম্পেন্সেসনগী মতেং পীরগনি হায়না চিফ মিনিষ্টরনা ফোঙদোকখি। সুনুসিফাই, নরানসৈনা, থম্নাপোকপীনচিংবদা লৈবা লৌমী শিন্মীশিংনা শূবা-নোম্বা লেপ্তনা হোৎনরিবা কয়া অসী তমজনিঙায়নি হায়না চিফ মিনিষ্টরনা থমখি। অথাবা তিন লোইথোকখিবদগী য়ূম মাঙ- তাকখ্রবশিংদা মখা তানা তিন পীবগী থবক চপ লেপ্তুনা লৈরি অদুবু চয়োল অসিগী মনুংদা মরী লৈনবা মীওইশিংদা লেন্না পাল্লবসু হোররোইদবা অথাবা তিন পীবগী থবক পায়খৎকনি হায়না চিফ মিনিষ্টরনা ফোঙদোকখি।
