চৎলিবা জুলাই থা অসীগী ১৫ দা খূৎলায় পায়বা শকখঙদবশিংনা ফাখ্রগা তমথীনা ফূবদগী শিখিবা চীরু কাঙলূপকি মরাঙ্গির মীহাত্তা চেন্নবশিং আইনগী মখাদা অকনবা চৈরাক পীগনি হায়না চিফ মিনিষ্টর নোংথোম্বম বিরেন না অকনবা ৱাফম ফোঙদোকখ্রে।
কোর্দিনেটিং কম্মিটি ওন মনিপুর ইন্টিগ্ৰিটি (কোকোমি) অমসুং য়ুনাইটেদ নাগা কাউন্সিল (য়ু এন সি) না সি এমগী সেক্রেটরিয়েত্তা থা অসীগী তরাতরেত্তা চিফ মিনিষ্টর নোংথোম্বম বিরেনগা উন্নদুনা মীহাৎ অদুদা চেন্নরিবশিংগী মথক্তা অকনবা চৈরাক পীবিননবা তকশীনখিবগা লোয়ননা মরাল লৈবশিং লোগী মখাদা অকনবা চৈরাক পীদনা লেম্না থাবগী ৱাফম লৈতে হায়না চিফ মিনিষ্টর না অচেৎপা ৱাফম ফোঙদোরকখ্রে।
লাইবক থীবা থৌদোক অদুদা চেন্নবশিং ফাগত্তুনা লো গী মখাদা চৈরাক পীননবা হোৎনবদা য়ু এন সি অমসুং কোকোমিনসু লৈঙাক্কি মফমদা অঙম্বা মতেং পাংবিয়ু হায়না চিফ মিনিষ্টরনা আপিল তৌখি। থৌদোক অদুগী মতাংদা ৱারোয়শিন পুরক্নবা হোৎনবদসু অঙম্বা থাক্তা মতেং পাংবিয়ু হায়না চিফ মিনিষ্টর অসীনা ফোঙদোকখি।
কোকোমিগী কোর্দিনেটর টি ঐচ সোমোরেন্দ্রো অমসুং য়ু এন সিগী প্রসিদেন্ট এন জি লোরহোনা লুচিংবা কাঙবূ অনীগী মায়কৈদগী মনিপুরদা থোক্লিবা হীংশাগী ঈরাং অসী অথুবদা সেন্টর অমসুং ষ্টেট লৈঙাক্না লোইশিলহন্ননবা অকনবা থবক পায়খৎলকপদা অঙম্বা থাক্তা মতেং পাংননবা কোকোমি অমসুং য়ু এন সি না থৌরাং তৌদুনা লৈরি হায়বা ৱাফম কয়াসু ফোঙদোকখি।
