মনিপুরগী খ্বাইদগী চাওরবা অমসুং খ্বাইদগী ফজখ্রবা কূহ্মৈ অমা ওইরিবা, মবূং-মৌপৱা অমদি মচল-মচেশিংগী মরক্তা নুংশি-চানবগী মরী হেন্না চেৎশীলহল্লিবা, চহী অমদা হীয়াঙ্গৈগী নীনী পানবা নুমিত্তা পাঙথোক্লিবা নিঙোল চাক্কৌবগী থৌরমদা ঐখোয়না খূদোলপোৎ তম্ননবগীদমক ঈরমদম অসীগী মীওইশিংনা শেম-শাজবা পোত্থোকখক্তমক লৈদুনা শীজিন্নরসি, মপান্দা শেল থাদোকপগী থবক খূদক অসীমক্তদগী লেপ্লসি, ঈরমদমগী আর্টিসানশিং, শিন্মিশিং য়োকখত্তুনা চাওখৎলবা, ঈং- তপ্পা, নুঙাই-য়াইফরবা মনিপুর অমা শেমগৎলসি হায়না মনিপুর হেন্দলূম এন্দ হেন্দিক্রাফট দেভলপমেন্ট কোরপোরেসন লিমিটেদ কি চ্যেরমেনসু ওইরিবা লম্লাই কেন্দ্রগী এম এল এ খোংবান্তাবম ইবোমচানা মীয়ামদা আপিল তৌরক্লি।
ঙরাং ইম্ফালগী পাউনা কৈথেলদা লৈবা কোরপোরেসন অসীগী ওফিস্তা পাঙথোকখিবা পাউমীশিংগা উনখিবা থৌরম অমদা মহাক্না ৱাফম অসী ফোঙদোকখিবনি। নিঙোল চাক্কৌবগী থৌরমদা খূদোলপোৎ পীবা, লৌবদা হিদান্নবগী মতমদু ঙসিদি ওইহল্লগুমসি। থৌওং অসীনা ঐখোয়গী খুন্নাই অসিগী শেন্মিৎলোন্দা মনীং হল্লকপা নত্তনা করিগুম্বা মখল অমত্তগী কান্নবা পুরকপা ঙম্লোই। মবূং- মৌপ্বা অমসুং মচল- মচেশিং উনদুনা অহাওবা চাক চারা অমা চাম্মিন্নরগা নুঙাই- য়াইফা থৌজাল পীরম্বগী ফজখ্রবা মচৎ অসীবু খূদোলপোৎ পীবরোমদা হিদান্নরকপগী চৎনবীরোমদা নাথৈদুনা পুথোকখিননবা হোৎনরকপা অসীনা ফজখ্রবা কূহ্মৈ অসীগী মতীক-মগুন হন্থহনবা নত্তনা অফবা অমত্তা পুরক্লোই হায়খি।
মনিপুরদা হৌজিক মীয়াম্না মায়োক্নরিবা অকনবা হীংশাগী ঈরাং অসিদা রিলিফ কেম্পশিংদা লৈরিবা ঈমা, ঈচা,, ঈচীল- ঈনাও, ঈচে-ঈচলশিংনা শাজবা পোৎলমশিং কোরপোরেসন অসীগী ওফিস্তা অমসুং ৱাংখৈদা লৈরিবা পান্থোইবি আর্কেদতগী ফংগনি হায়নসু মহাক্না ফোঙদোকখি।
