চাইনা না খ্বায়দগী এদভান্স ওইরবা অনৌবা জে-২০ ষ্টিল্থ ফাইটর জেট কয়ামরুম সিক্কিম মনাক্তা থমজিল্লক্লি

জে-২০ মাইটি দ্রাগোন হায়না মিংথোনবা ফাইব জেনরেসনগী অনৌবা, য়াম্না সোফিষ্টিকেটেদ ওইরবা ষ্টিল্থ ফাইটর জেট কয়ামরুম চাইনা না লাইন ওফ একচুয়েল কন্ট্রোল মনাক্তা ইন্দিয়াগী সিক্কিম ষ্টেটকা নক্নবা মফম অমদা থমজিল্লকখ্রে। এদভান্স ফাইটর জেট অসিদা মতম অসীগী খ্বায়দগী এদভান্স ওইরবা অনৌবা ইক্বিপমেন্ট কয়ামরুম য়াওরবা মরম্না লাল অমা য়েক্নবশিংগা মায়োকনরকপা মতমদা ফ্রন্ট লাইন্দা লৈদুনা এত্তেক চত্থবা ঙম্ননবা পান্দমদা চাইনানা থৌরাং তৌরকপনি হায়রি।
অসীগুম্বা হৌজিক মতমগী অয়ৌবি থাক্তা এদভান্স ওইরবা ষ্টিল্থ ফাইটর জেট মখল অসী চাইনানা লাইন ওফ একচুয়েল কন্ট্রোল পরীংদগী শুপ্নগী কিলোমিটর ১৫০ রোমদমক লাপ্না লৈরিবা মফম অমদা থমজিল্লকখিবনি।
জিওস্পাটিকেল ইন্টলিজেন্স এজেন্সিশিংনা থাদোরকখিবা সেটলাইট ইমেজশিংদগী খঙবা ঙম্বগী মতূং ইন্না য়াম্না সোফিষ্টিকেটেদ ওইরবা অনৌবা জে- ২০ ফাইটরশিং অদু টিবেত্তা লৈবা সিগাটসে এয়রপোর্ট তা লৈবনি হায়বদু ময়েক শেংনা ঊৎখি। হায়রিবা এয়রপোর্ট অদু সমুদ্র ঈমায়দগী ফুট ১২৪০৮ ৱাংবা মফমদা লৈবনি।
মালেমগী ওইনসু মসীনা খ্বায়দগী অৱাংবা ওলটিচুদতা লৈরিবা এয়রপোর্ট অমা ওইরিবনি হায়রি।
জে- ২০ গী ফাইটর জেট কয়ামরুম মফম অদুদা লৈরে হায়বসি হৌখিবা মে থাগী ২৭ তা সেটলাইট ইমেজশিংদগী খঙবা ঙম্লকখিবনি। নুমীৎ অদুমক্ত দা এয়রক্রাফট মখল অসীগী অমা সিক্কিম মনাক্তা য়াম্না নক্না পাইশিল্লকপগী থৌদোক লৈখি হায়নসু সেটলাইট ইমেজশিংদগী খঙবা ঙম্লকখিবনি।