মতম কুইনা তূমদুনা লৈরুরবা মতূংদা হন্দক সেন্টর লৈঙাক্কি হোম মিনিষ্টর অমিট শাহানা মনিপুরগী ঈরাং অসী লোইশিন্নবনি হায়দুনা নাগা, মৈতৈ অমসুং কুকী ফূরুপকি এম এল এ শিং পূন্না মীফম পাঙথোক্ননবা কৌরক্তুনা ন্যু দিল্লিদা মীফম পাঙথোকপা হৌখিবা অসী অফবা খোঙথাঙ অমনি । অদূম ওইনমক মরৌ চাউবা সেন্টর লৈঙাক্না মনিপুর কায়বা য়াবা ৱাফম হৌদোরকপা তারবদি ঐখোয়গী য়েলহৌ এম এল এ শিংনা খক য়ারোইদবনি। কুকিশিংগী দিমান্দ কৈদৌনুংদা পীবা য়াররোইদবা অমনি। করিগুম্বা সেন্টরনা অসীগুম্বা দিমান্দ অসীগী ফেবরদা লাকপা তারবদি ঐখোয়গী য়েলহৌ এম এল এ ৫০ মক মশা-মশাগী ফমদগী রিজাইন তৌবিগদবনি হায়না সিব সেনা মনিপুর য়ুনিটকি প্রসিদেন্ট ওইরিবা দা. মোইরাংথেম তোম্বীনা ফোঙদোকখ্রে।
হৌজিক ন্যু দিল্লিদা লৈরিবা এম তোম্বীনা ভিদিও রেকোর্দিং অমদা মহাক্কি ৱাফম অসী ফোঙদোরকখিবনি। ম্যান্মারদা লৈরগনা কে এন এ (বি) হায়না কৌবা, অদুগা মনিপুরদা লাক্লগনা কে এন এ হায়না খঙনরিবা অসীগুম্বা টেরোরিস্টশিংনা কুকি এম এল এ তরাগা লোয়ননা মনিপুরদগী শেগায়রগা মখোয়গী তোঙানবা হোমলেন্দ অমা লেজিসলেচরগা লোয়ননা ফংননবা দিমান্দ তৌদুনা লাক্লি।
ম্যান্মার, বংলাদেসনচিংবদগী চঙশীল্লকপা মাইগ্ৰেন্ট কুকিশিংনা মখোয়খক্তগী ওইবা হোমলেন্দ অমা লেজিসলেচরগা লোয়ননা ফংননবা দিমান্দ তৌরিবা অসী কৈদৌনুংদা পীবা য়াররোইদবা অমখক্নি। হীরম অসীদা করিগুম্বা মওং অমত্তদা কমপ্রোমাইজ তৌবা য়ারোই হায়না মহাক্না ফোঙদোরকখি।
