সি এ পি এফ, ষ্টেট ফোর্সকি অপূনবা ওপরেসন্দা বঙ্কর ৩ থুগাইবা ঙমখ্রে, খূৎলায় কয়া ফংলে

বিষ্ণুপুর দিষ্ট্রিক্টকি নরানসৈনা মনীংদা লৈবা অনীশুবা আই আর বি হেদক্বারটর্সতা এট্টেচ তৌবা সি আর পি এফ কি ১২৮ শুবা বট্টালিয়ন্দা থা অসীগী ২৭কি অহীংদা কুকি মিলিটেন্টনি চিংনবা, অফবা মখলগী খূৎলায় মতীকচানা পায়বশিংনা বোম অমসুং নোংমৈ মশীং খঙদনা কাপশীন্দুনা এট্টেক চত্থরকখিবা মতমদা সি আর পি এফ পার্সনেল অনী শিখিবা অমসুং অতোপ্পা অনীনা শাথিবা ফিভমদা শোকহন্দুনা হোস্পিটালাইজ তৌখিবা মতূং ঙরাং মনিপুর পুলিস অমসুং সেন্ট্রেল পেরামিলিটরি ফোর্সকি অপূনবা খূৎপু অমনা চত্থরকখিবা কম্বাইন সর্স ওপরেসন্দা নোংমৈ য়াওনা খূৎশু-খূৎলায় কয়া রিকোভর তৌবা ঙমখ্রে।

লাংচীংমানবি অমসুং খোইরেন্তাক এরিয়াশিংদা চত্থখিবা ওপরেশন অদুদা কুকি মিলিটেন্টশিংনা শারম্বা বঙ্কর অহূমসু থুগাইখি। পোকখায়দ্রিবা চাইনানা শাবা হেন্দ গ্ৰেনেদ অনী, নোংমৈ মরূ ১৪৫,এম্পটি কেস ১৯৭,প্রোজেক্তাইল ৩২ অমসুং ৱাকি তোকি অমা রিকোভর তৌবা ঙমখ্রে। পোকখায়দ্রিবা চাইনানা শাবা হেন্দ গ্ৰেনেদ অনীদু মনিপুর পুলিসকি বোম স্কৱাদ টিম অমনা অশোয়- অঙাম য়াওদনা দিস্পোজ তৌখ্রে হায়রি।

সি আর পি এফ পার্স নেল অনী শিখিবা অমসুং অতোপ্পা পার্সনেল অনী শোকহনখিবা থৌদোক অদুবু মনিপুরগী চিফ মিনিষ্টর নোংথোম্বম বিরেন্না খ্বাইদগী অকনবা মওংদা কন্দেম তৌখিবগা লোয়ননা মরাল লৈবশিংগী মথক্তা অকনবা চৈরাক পীদনা কৈদৌনুংদা লেম্না তোক্লোই হায়না ফোঙদোকখি।