লৈবাকপোকপা নুমিত্তা য়ুনিয়ন ফাইনান্স মিনিষ্টর নির্মালা সিতারমন্না পুথোকখিবা য়ুনিয়ন বদজেট ২০২৪-২৫ অসী লৈবাক অসীদা লৈরিবা খুঙ্গং খূদিংমক, য়ূমথোঙ খূদিংমক তা লৈরিবা মীওই পূম্নমক ওন্ট্রপ্রিন্যর অমমম ওইহন্দুনা, লাইরবশিংগী শেল-থুমগী থাক ৱাংখৎহন্দুনা, নহারোলশিংদা অনৌবা ঈনোৎ পীদুনা, ও বি সি অমসুং লৌমীশিংদা অনৌবা আশা পীদুনা কুমশিং ২০৪৭ ফাওবদা মালেমগী দেভলপ কন্ট্রিশিংগী মনূং চন্ননবা চঙশীল্লক্লিবা খোঙথাঙ অসী খূমাঙ চাওশীন্ননবা পান্দমদা পুথোকপা বদজেট অমনি হায়না প্রাইম মিনিষ্টর নরেন্দ্র মোদি না ফোঙদোক্ল দুনা বদজেট অসীবু য়াম্না কন্না থাগৎপা ফোঙদোকখরে।
হন্দক্কি শেনবা চহী ২০২৪-২৫ গী বদজেট অসী চাওখৎপা, নুঙাই-য়াইফবা ইন্দিয়া অমা শোয়দনা পুরক্ননবা পান্দম অমদা শেম্বা বদজেট অমনি। বি জে পিনা লুচিংবা এন দি এগী লৈঙাক অমা লাকখিবা চহী তরাগী মতমসিদা ইন্দিয়াদা মীওই ক্রোর ২৫ লায়রবা থাক্তগী চিংখৎলকপা ঙমখ্রে হায়না প্রাইম মিনিষ্টর নরেন্দ্র মোদি না ফোঙদোকখি।
ন্যো মিদ্দল ক্লাস কি কাঙলূপশিংদা অহেনবা শক্তিশিং বদজেট অসীনা পীননবা থৌরাং তৌরি। ইন্দিয়ানা মালেমগী অহূমশুবা খ্বায়দগী চাউরবা ইকোনোমি অমা লাক্লিবা কুমশিং ২০২৭ ফাওবদা ওইনবা হোৎনরিবা অসীদা অনৌবা বদজেট অসীনা চাউনা ঈনোৎ হাপ্লগনি হায়না নরেন্দ্র মোদি না ফোঙদোকখি।
