বোসেমগী ষ্টাফশিংনা চত্থরিবা পেন দাউন ষ্ট্রাইক মহৈরোয়শিংগী য়েংবিদুনা হন্দোকপিয়ু : আই ৱাই এ কে

শেঞ্জা থুমজাগী য়াওনা ৱাথোক কয়াদা চেন্নবদগী ট্রান্সফর তৌখ্রবা মীওই অমবু বোর্দ ওফ সেকেন্দরি ইদুকেসন মনিপুর (বোসেম) গী চ্যেরমেন ওইনা লৈঙাক্না নৌহৌননা থাজিল্লকপা থৌওংবু খম থেংনা য়ানিংদবা ফোঙদোক্তুনা বোর্দ অসিগী ষ্টাফশিংনা পেনদাউন ষ্ট্রাইক চত্থরকপা মতম শাংলক্লে। মসীনা মরম ওইদুনা বোর্দ অসিগী মখাদা লৈরিবা মহৈরোয়শিংদা য়াম্না চাউনা খুদোংচাদবশিং মায়োক্নহল্লক্লি।একাদেমিক সেসন ২০২৪-২৫ গী ওইনা পাঙথোক্কদৌরিবা হায় স্কুল লিভিং সার্টিফিকেট (ঐচ এস এল সি) এগজামিনেসনগী মতমসু য়াম্না নকশীল্লক্লি। মসীগীসু মথক্তা মহৈরোয়শিংনা অনৌবা সার্টিফিকেট তান্থোক্নবগীদমক লাকপা, ঐচ এস এল সি সার্টিফিকেট করেক্সনগা মরী লৈননা বোর্দ অসিগী ষ্টাফ অমসুং ওফিসিয়েলশিং উননবা লাক্লবসু পেনদাউন ষ্ট্রাইক অসীনা মরম ওইদুনা মহৈরোয়শিংদা য়াম্না চাউনা খুদোংচাদবশিং মায়োক্নহল্লক্লি।

মহৈরোয়শিংগী অমদি গভর্নমেন্ট ওফিসিয়েলশিংগী ওফিসিয়েল দেট ওফ বারথ অসী হায় স্কুল লিভিং সার্টিফিকেট তা য়ূম্ফম ওইদুনা লেপ্লিবনি। মরম কয়া অসি লৈবনা হৌজিক বোর্দ অসিগী ষ্টাফশিংনা চত্থরিবা পেন দাউন ষ্ট্রাইক অসী মহৈরোয়শিংগী য়েংবিদুনা হন্দোকপিয়ু হায়না ইন্দিজেনস য়ূথ এসোসিয়েসন ওফ কংলৈপাক ( আই ৱাই এ কে) না আপিল তৌরক্লি।

ষ্টাফশিংনা চত্থরিবা পেন দাউন ষ্ট্রাইক অসীগী মতাংদা মরী লৈনবা লৈঙাক্কি অথোরিটিনসু অথূবা মতমদা অকনবা মীৎয়েং চঙবিদুনা ৱারোয়শিন পুরক্নবা থবক পায়খৎপিয়ু হায়না এসোসিয়েশন অসিগী জেনরেল সেক্রেটরি এন ইনাওবা অঙোম্না খূৎয়েক পীদুনা থাদোরকপা প্রেস ষ্টেটমেন্ট অমদা ফোঙদোরক্লি।