ইম্ফাল ইষ্ট দিষ্ট্রিক্টকি ৩/১১ মোইরাংকম্পু সজেপ অপ্পর প্রাইমারি স্কুল পোল্লিং স্তেসনদা বি জে পিনা থাদোকপা খূৎলায় পায়বা লমহেন- তুহেনবা মীওইশিংনি হায়বা খরনা নোংমৈ কাপশীল্লকপদা অহল ওইরবা নূপা অমা অরুবা ফীভমদা নোংমৈ না পান্দুনা শোকপদগী হোস্পিটালদা পুখত্তুনা লায়কন্নখ্রে। খূৎলায় পায়বা লমহেন- তুহেনবা মীওইশিং অদুনা কংগ্রেস কি এজেন্ত অমা ফারগা পুননবা হোৎনবদা নোংমৈ কাপশীল্লকপদা অহল ওইরবা নূপা অদুদা নোংমৈনা পান্দুনা শোকপদগী হোস্পিটালদা পুখত্তুনা লায়কন্নখিবনি হায়রি।
ঙরাং পাঙথোকখিবা লোক সভাগী মীখল অদুদা ইন্নর মনিপুর পারলিয়ামেন্টরি কন্সটিট্যুয়েন্সিগী ৩/১১ মোইরাংকম্পু সজেপ অপ্পর প্রাইমারি স্কুল পোল্লিং স্তেসন মনুংদা চঙশীল্লক্তুনা খূৎলায় পায়বা গুন্দাশিং অদুনা কংগ্রেসকি এজেন্ত অমা পুথোক্নবা হোৎনরকপদা মীয়াম্না মফম অদুদা চঙশীল্লক্তুনা নিঙাই শংদান্নরকখি। মতমদুদা খূৎলায় পায়বা মীওইশিং অদু মফম অদু থাদোক্তুনা চেন্ননবা হোৎনরকখি। মখোয়না গারি মনূংদগী নোংমৈ কাপশীল্লকপদা অহল অদুদা পান্দুনা শোকপদগী হোস্পিটালদা পুখত্তুনা লায়কন্নখিবনি।
মহাক্কী য়েৎ থংবা নঙ্গলদা পান্দুনা শোকখিবা অশোকপা অহল অদুগী মমিং খোইস্নাম সনায়াইমা(৬৫) কৌই, মোইরাংকম্পু সজেপ মখা লৈকাইদগীনি হায়রি। মফম অদুদা মকোকথোংবা পুলিস ওফিসারশিং চঙশীল্লক্তুনা য়েংশিনখিবগা লোয়ননা চেন্নরিবা মীওইশিং অদু ফাগৎপা ঙম্লে হায়না ফোঙদোকখি।
