ভার্টিয়া জনটা পার্টি (বি জে পি) গী নেস্নেল প্রসিদেন্ট ওইনা লৈরকখিবা জে পি নাদ্দাগী মতম লোইরবা মতূংদা মমাঙ থা জূন ফাওবা মতম শাংদোক্তুনা লাকখ্রবসু মখা তানা থবক পায়নবগী খুদোংচাবা লৈখিদ্রবা মতূংদা পার্টি অসীগী অনৌবা প্রসিদেন্ট অমা লাক্কদৌরিবা দিসেম্বর থাদা হাপ্ননবা থৌরাং তৌরে হায়রি। পার্টিগী খ্বাইদগী মথকথোংবা ফমথোল অসীগী মীখলগী প্রোসেস চহী অসীগী আগষ্ট থাগী অমদগী হৌরগনি হায়রি।
পার্টি অসীগী নেস্নেল প্রসিদেন্ট কি মীখল অসী পাঙথোক্ট্রিঙৈ মাঙোইননা কম্প্রেহেন্সিপ মেম্বরশিপ দ্রাইব অমা পাঙথোক্কনি। দিষ্ট্রিক্ট অমসুং ষ্টেট য়ুনিটশিংগী মপাঙ্গল হেন্না কনগৎহন্ননবা কেম্পেইনগী থবকসু মাঙজৌননা চত্থখিগনি। মেম্বরশিপকি দ্রাইব অদু চহী অসীগী সেপ্তেম্বর ১৫ ফাওবা চত্থরগনি হায়না পাউগী লীখূল অমনা ফোঙদোরক্লি।
মদুগী অমুক মতূংদা সেপ্তেম্বর ১৬ তগী এক্টিব মেম্বরগী কেম্পেইন অমা হৌদোক্লগা থা অদুগী ৩০ ফাওবা চত্থগদবনি হায়রি। চহী অসীগী ওক্তোবর অমদগী তরামঙাফাওবা পার্টিগী এক্তিব মেম্বরশিংগী ভেরিফিকেসন দ্রাইব চত্থরগনি। বি জে পিগী পার্টি কন্সটিট্যুসন মতূং ইন্না মেম্বর খূদীংমক চহী মাপন খূদীংগী মশা-মশাগী মেম্বরশিপ রিন্যু তৌগদবনি। হন্দক্কি চহী অসীদা প্রাইম মিনিষ্টর নরেন্দ্র মোদী য়াওনা অতৈ পার্টিগী লুচিংবা কয়ামরুম রিন্যু তৌবা মথৌ তাই হায়না পাউগী লীখূল অসীনা হায়রি।
